عثمان ڈار کی والدہ ریحانہ ڈار نے سوشل میڈیا پر اپنے کاغذات نامزدگی مسترد ہونے کا خدشہ ظاہر کر دیا ۔ سماجی رابطوں کی ویب سائٹ پر اپنے پیغام میں انہوں نے کہا کہ مصدقہ اطلاع کے مطابق ریٹرننگ افسر محمداقبال خواجہ آصف کے دباو پرمیرے کاغذات نامزدگی مسترد کرنے کا ارادہ کر چکے ہیں ،میں واضح کر دوں کہ کپتان کی کھلاڑی ہوں ،آخری بال تک خواجہ آصف کا مقابلہ کروں گی۔ ایسی کسی بھی غیر قانونی کوشش کو اعلی عدلیہ بشمول سپریم کورٹ تک چیلنج کروں گی۔
دوسری طرف سوشل میڈیا پر ریحانہ ڈار کے کل کاغذات نامزدگی مستردہونے سے متعلق مختلف خبریں اور افواہیں وائرل ہیں جن میں دعویٰ کیا جا رہا ہے معمولی اراضی کو ظاہر نہ کئے جانے کا جواز بنا کر ریحانہ ڈار کے کل کاغذات نامزدگی مسترد کئے جائیں گے۔ اس حوالے سے شہباز گل سمیت متعدد پی ٹی آئی کے سوشل میڈیا ایکٹوسٹس کے بیانات سامنے آ رہے ہیں جس میں کاغذات نامزدگی مسترد کرنے کے اقدام کی شدید مذمت کی جا رہی ہے۔
