مبینہ انتخابی دھاندلی کیخلاف پاکستان تحریک انصاف کی جانب سے نکالی جانے والی ریلی کے دوران پولیس نے لطیف کھوسہ، سلمان اکرم راجہ اور متعدد کارکنوں کو حراست میں لے لیا۔
عام انتخابات میں مبینہ دھاندلی کیخلاف پی ٹی آئی کارکنان بانی تحریک انصاف کی کال پر ریلی کی صورت میں جی پی او چوک لاہور پہنچے، ریلی کی قیادت رہنما تحریک انصاف علی اعجاز بٹر نے کی۔پی ٹی آئی کے سینئر رہنما سردار لطیف کھوسہ کو بھی گرفتار کر لیا گیا، لطیف کھوسہ کے بیٹے شہباز کھوسہ نے بتایا کہ والد انتخابات میں مبینہ دھاندلی کیخلاف احتجاج کے لئے جارہے تھے، لطیف کھوسہ کو صدر کینٹ گول چکر سے گرفتار کیا گیا، پولیس نے سلمان اکرم راجہ کو اچھرہ سے حراست میں لے لیا۔
ریلی کو روکنے کیلئے پولیس نے کارکنوں پر دھاوا بول دیا، جس سے پی ٹی آئی کارکنان منتشر ہوگئے، جبکہ پولیس نے تحریک انصاف کے ایم پی اے حافظ فرحت عباس سمیت 10 سے زائد کارکنان کو حراست میں لے لیا۔گرفتاری کے موقع پر ایم پی اے حافظ فرحت عباس کا کہنا تھا کہ مینڈیٹ چور وزیراعلی نے گرفتاری کروائی ہے۔
