اسلام آباد (آئی پی ایس )عالمی مالیاتی ادارے(آئی ایم ایف)نے رواں مالی سال 25- 2024 میں پاکستان میں مہنگائی اور بے روزگاری میں کمی کی پیش گوئی کر دی ہے۔
آئی ایم ایف کی جانب سے جاری ورلڈ اکنامک آوٹ لک رپورٹ 2024 کے مطابق رواں مالی سال پاکستان میں مہنگائی کی اوسط شرح 9 اعشاریہ5فیصد رہے گی اور بے روزگاری کی شرح کم ہوکر 7اعشاریہ5 فیصد پر آنے کا امکان ہے اور معاشی ترقی کی رفتار میں بھی بتدریج تیزی متوقع ہے۔رپورٹ میں بتایا گیا کہ پاکستان میں اس سال مہنگائی کی اوسط شرح 9اعشاریہ5فیصد رہے گی جو گزشتہ سال 23 فیصد سے زیادہ تھی، مہنگائی کی سالانہ شرح 12 فیصد ہدف کے مقابلے میں 10اعشاریہ6فیصد تک محدود رہنے کی بھی توقع ہے۔
آئی ایم ایف نے کہا کہ رواں مالی سال شرح نمو 3اعشاریہ2فیصد رہے گی، اگلے سال 4فیصد اور 2029 تک بتدریج 4اعشاریہ5 فیصد تک پہنچنے کا امکان ہے۔
ورلڈ اکنامک آوٹ لک رپورٹ کے مطابق 2024 میں عالمی معیشت 3اعشاریہ2فیصد کی شرح سے ترقی کرے گی، البتہ علاقائی تنازعات، سماجی تناو اور موسمیاتی تبدیلی کے خطرات سے پیٹرولیم مصنوعات اور اجناس کی عالمی سپلائی اور پالیسی ریٹ میں کمی کی کوششیں متاثر ہو سکتی ہیں۔آئی ایم ایف نے کہا کہ امریکا میں صدارتی انتخابات سمیت دنیا کے مختلف ممالک میں الکیشنز سے عالمی معاشی پالیسیوں میں تبدیلی بھی متوقع ہے۔
