اسلام آباد (ٹی این ایس) گلبرگ گرین اسلام آبادمیں عظیم الشان استحکام پاکستان گوجر کنونشن و تقریب حلف برداری گوجر یوتھ فورم کا انعقاد کیا گیا۔ کنونشن کے مہمان خصوصی سردار گوجر قوم سنیٹر چوہدری محمد جعفر اقبال سابق ڈپٹی اسپیکر قومی اسمبلی پاکستان تھے۔ سردار قوم نے گوجر یوتھ فورم راولپنڈی ڈویژن سمیت آزاد جموں کشمیر کی نو منتخب مرکزی اور ضلعی باڈی سے حلف لیا۔ اس موقع پر خطاب کرتے ہوئے سنیٹر چوہدری محمد جعفر اقبال نے کہا کہ ہمارے لیے سب سے پہلے پاکستان ہے۔ پاکستان ہے تو ہم سب ہیں اس لیے ہم سب کو پاکستان کی ترقی ، خوشحالی اور استحکام کے لیے مثالی کردار ادا کرنا ہے۔ ہمار ا کسی کے ساتھ کوئی تعصب نہیں بلکہ اپنی قوم کو متحد اور منظم کرکے اپنی نوجوان نسل کو وطن عزیز کی سالمیت اور استحکام کے لیے کردار ادا کرنے کی ترغیب دینا ہے۔قیام پاکستان سے لے کر استحکام پاکستان تک گوجر قوم کے سپوتوں نے قابل فخر کارنامے سرانجام دیئے ہیں۔ چوہدری رحمت علی وہ پاکستانی تھے جنھوں نے 1915 میں بزم شبلی کا قیام عمل میں لا کر نظریہ پاکستان اور تحریک پاکستان کی بنیاد رکھی ۔ یہ عظیم پاکستانی تھا جس نے وطن عزیز کا سب سے پہلے نہ صرف تصور پیش کیا بلکہ وطن عزیز کو پیارا نام پاکستان اور نقشہ بھی فراہم کیا۔ لہذا بانی تحریک پاکستان، نقاش پاکستان و خالق اسم پاکستان کے اس عظیم محسن کا جسد خاکی آج بھی امانتاً دیار غیر میں مدفون ہم سب اور ہماری حکومت کا منتظر ہے کہ کب ان کا جسد خاکی قومی اعزاز کے ساتھ وطن عزیز میں لایا جائے۔ چوہدری رحمت علی بانیان پاکستان میں سے ہیں وہ کسی ایک قوم یا قبیلے کے لیڈر نہیں تھے بلکہ ایک سچے اور محب وطن پاکستان تھے۔ جن کی سوچ و فکر اور کردار میں پاکستانیت کے سوا کچھ نہیں تھا۔ کنونشن سے ممبر قوم قوم اسمبلی سردار محمد یوسف سابق وفاقی وزیر، ممبر قومی اسمبلی بیرسٹر عقیل ملک مشیر برائے قانونی امور، چوہدری رشید وزیر حکومت آزاد کشمیر، فیاض الحسن چوہان سابق صوبائی وزیر، چوہدری نعیم علی ایڈوکیٹ صدر اسلام آباد بار ایسوسی ایشن، فرزند حویلی چوہدری محسن عزیز، چوہدری عامر نذیر، مولانا عبدالمجید ہزاروی، چوہدری طارق جاوید ایڈوکیٹ، چوہدری نسیم ایڈوکیٹ، چوہدری شہزاد گوجر، چوہدری کامران یونس، چوہدری نمیر کھٹانہ، کرنل میاں محمد اکرم ، چوہدری سفیر کاندل ،چوہدری ناصف محمود گورو اور دیگر نے بھی خطاب کیا۔
