اسلام آباد (ٹی این ایس)(آئی پی ایس) حکومتِ سعودی عرب نے پاکستان کے لیے حج 2025ء کے کوٹے میں 10 ہزار عازمین کا غیرمعمولی اضافہ کر دیا ہے، جس کے بعد ہزاروں مزید پاکستانی شہری اس سال فریضۂ حج ادا کر سکیں گے۔
وزیرِ اعظم شہباز شریف کی خصوصی ہدایت پر نائب وزیرِ اعظم و وزیرِ خارجہ سینیٹر محمد اسحاق ڈار نے سعودی وزیرِ خارجہ شہزادہ فیصل بن فرحان السعود سے رابطہ کیا اور ان پاکستانی شہریوں کے لیے اضافی حج کوٹے کی درخواست کی جو مقررہ آخری تاریخ گزر جانے کے باعث حج کے لیے رجسٹریشن نہ کر سکے تھے۔
پاکستانی حکومت کی اس خصوصی درخواست پر سعودی حکام نے مثبت ردِعمل دیتے ہوئے پاکستان کا حج کوٹہ 10 ہزار مزید افراد کے لیے بڑھا دیا ہے۔
اس اقدام کو پاکستان اور سعودی عرب کے درمیان قریبی برادرانہ تعلقات، باہمی اعتماد اور سعودی حکومت کی پاکستانی عوام سے خصوصی وابستگی کا مظہر قرار دیا جا رہا ہے۔
وزارتِ مذہبی امور کا کہنا ہے کہ جلد ہی اضافی حج کوٹے کے حوالے سے رجسٹریشن اور دیگر تفصیلات جاری کر دی جائیں گی تاکہ مزید 10 ہزار پاکستانی شہری حج 2025ء کی سعادت حاصل کر سکیں۔
