اسلام آباد (ٹی این ایس) صدرِ مملکت آصف علی زرداری نے آپریشن بنیان مرصوص کے دوران شاندار جرات، بہادری اور قربانیوں کا مظاہرہ کرنے والے مسلح افواج کے افسران اور جوانوں کو اعلی فوجی اعزازات سے نوازا ہے،8افسران کو ستارہ جرات، 5 کو تمغہ جرات اور 24 کو ستارہ بسالت عطا کیے گئے ،صدرِ مملکت نے مزید 45 افسران و جوانوں کو تمغہ بسالت سے نوازا۔
پاک فوج کے شعبہ تعلقاتِ عامہ (آئی ایس پی آر)کا کہنا ہے کہ آپریشن بنیان مرصوص کے دوران غیر معمولی جرات اور عظیم قربانی پر آرمی، نیوی اور ایئر فورس کے افسران و جوانوں کو عسکری اعزازات سے نوازا گیا۔
آئی ایس پی آر کے مطابق صدرِ مملکت آصف علی زرداری نے پاک فوج کے 488 افسران اور جوانوں کو اعزازات عطا کیے۔8 جوانوں کو ستارہ جرات، 5 کو تمغہ جرات، 24 کو ستارہ بسالت سے نوازا گیا۔ 45 جوانوں کو تمغہ بسالت، 146 کو امتیازی اسناد سے نوازا گیا، 259 کو چیف آف آرمی اسٹاف تعریفی کارڈز اور ایک جوان کو تمغہ امتیاز ملٹری دیا گیا۔
پاک فوج کے شعبہ تعلقات عامہ کے مطابق لانس حوالدار عامر شیراز شہید، نائیک عبد الرحمن شہید کو تمغہ جرات سے نوازا گیا۔شہید لانس نائیک اکرم اللہ، سپاہی عدیل اکبر اور کیپٹن علی حسن کو بھی تمغہ جرات سے نوازا گیا۔آئی ایس پی آر کے مطابق ستارہ جرات پانے والوں میں ونگ کمانڈر بلال رضا، ونگ کمانڈر حماد ابن مسعود شامل ہیں۔اسکواڈرن لیڈر ایم یوسف خان، اسکواڈرن لیڈر محمد اسامہ اشفاق کو بھی ستارہ جرات عطا کیا گیا۔اسکواڈرن لیڈر محمد حسن انیس، طلال حسن، فدا محمد کو بھی ستارہ جرات سے نوازا گیا۔
آئی ایس پی آر کے مطابق ستارہ جرات پانے والے تمام افسران کا تعلق پاک فضائیہ سے ہے۔اہم شخصیات میں ڈی جی آئی ایس آئی، ڈی جی آئی ایس پی آر، کور 1 اور کور 10 کے کمانڈرز، اور ڈی جی ایم بھی ستارہ بسالت پانے والوں میں شامل ہیں۔اسی طرح ایئر وائس مارشل اورنگزیب اور وائس ایڈمرل راجا رب نواز کو بھی ستارہ بسالت دیا گیا۔
