اسلام آبادستمبر 18(ٹی این ایس) وزیر داخلہ احسن اقبال نے کہا ہے کہ لاہور الیکشن میں ملکی ترقی کو فتح ملی جبکہ عوام نے نوازشریف کی قیادت پراعتماد کا اظہار کیاہے ۔ اسلام آباد میں ایشیا پیس فلم فیسٹیول کی افتتاحی تقریب سے خطاب کرتے ہوئے وزیر داخلہ احسن اقبال نے کہاکہ پاکستان ایسا نہیں ہے جیسا سی این این دکھاتا ہے ٗ پاکستان پر امن ملک ہے اور ملک میں امن بحال ہوچکا ہے ٗپاکستان میں بزنس کی راہیں کھل چکی ہیں جبکہ مجھے توقع ہے کہ فلم فیسٹیول کے شرکا پاکستان کے لیے سفیر کا کردار کریں گے اور غیر ملکی فلمساز پاکستان سے واپس جاکر پاکستان کے بارے میں مثبت رائے دیں گے۔
احسن اقبال نے کہاکہ پرامن پاکستان کا تشخص دنیا کے سامنے رکھیں گے، دنیامیں معیشت کو مضبوط بنانے کی دوڑ ہے جب کہ ترقی امن سے ممکن ہے تاہم خطرے میں گھیرا ہوا ملک یا خطہ ترقی نہیں کر سکتا، ملک کی ترقی کیلئے اندرونی استحکام ضروری ہے۔ انہوں نے کہاکہ پاکستان نے دہشت گردی کو شکست دی ہے، پاکستان کو جس بین الاقوامی میڈیا نے خطر ناک قرار دیا، آج وہی میڈیا کہتا ہے پاکستان ایشیا کی معاشی طاقت بننے جا رہاہے۔وزیر داخلہ نے کہا کہ لاہورالیکشن میں ملکی ترقی کو فتح ملی، عوام نے نوازشریف کی قیادت پراعتماد کا اظہار کیا جبکہ کارکنوں کو غائب کرنے میں جو بھی سملوث ہوا اس کے خلاف کارروائی کی جائے گی۔ انہوں نے کہاکہ کوئی دوسراملک اپنی سرزمین پاکستان کے خلاف دہشت گردی میں استعمال نہ ہونے دے جب کہ کوئی بھی ملک میں دہشت گردی کرائے گا اس کے خلاف آوازاٹھاتے رہیں گے۔اس سے قبل احسن اقبال جب وقت مقررہ پر پہنچے تو انتظامات مکمل نہ ہونے پر انتظامیہ پر برہم ہوکر واپس چلے گئے تاہم بعد میں وہ دوبارہ آئے۔
