اسلام آباد (ٹی این ایس) وفاقی وزیر مذہبی امور و بین المذاہب ہم آہنگی، سردار محمد یوسف نے چیئرمین اسلامی نظریاتی کونسل علامہ ڈاکٹر محمد راغب حسین نعیمی سے ان کے دفتر میں ملاقات کی۔
ملاقات میں باہمی دلچسپی کے امور پر تبادلہ خیال ہوا جس میں خاص طورپر نظام زکوٰۃ اور نظام صلوٰۃ شامل تھے۔ جناب وفاقی وزیر نے نظام زکوٰۃ پر کونسل کی طرف سے معاونت مانگی اور جناب چیئرمین ڈاکٹر راغب نعیمی نے اس ضمن میں ہر طرح کے علمی تعاون کی یقین دہانی کروائی۔ جناب چیئرمین نے گفتگو کے دوران کہا کہ اس پر مذہبی امور اور اسلامی نظریاتی کونسل کے محققین پر مشتمل ورکنگ گروپ تشکیل دیا جائے۔
سردار یوسف صاحب نے کہا کہ رویت ہلال کمیٹی سے متعلق بھی امور قابل غور ہیں اور اس کو مزید فعال بنانے کی ضرورت ہے۔ جناب چیئرمین نے رویت ہلال کمیٹی پر قومی اسمبلی سے قانون سازی کو انتہائی ضروری قرار دیا اور اس کے دائرہ کار کو ڈویژنل سطح تک بڑھانے کے بارے میں رائے دی۔
وفاقی وزیر صاحب نے اسلامی نظریاتی کونسل کے کارہائے منصبی کو سراہا نیز انھیں سابقہ اجلاسات کے ایجنڈا پر بریفنگ دی گئی۔
(رانا زاہد)
میڈیا کوآرڈینیٹر
