راولپنڈی (ٹی این ایس); افغان طالبان, بھارتی اسپانسرڈ فتنۃ الخوارج کی جانب سے پاکستان پر بلااشتعال اور بزدلانہ جارحیت کے خلاف مادر وطن کا دفاع کرتے ہوئے شہادت کو قبول کرنے والے بارہ شہداء کی نماز جنازہ آج چکلالہ گیریژن راولپنڈی میں ادا کی گئی۔
انٹر سروسز پبلک ریلیشنز (آئی ایس پی آر) کے مطابق نماز جنازہ میں فیلڈ مارشل سید عاصم منیر، ، چیف آف آرمی سٹاف، وفاقی وزراء، گورنر کے پی ، سول و فوجی افسران اور عوام نے شرکت کی۔
اس موقع پر گفتگو کرتے ہوئے وزیر دفاع خواجہ آصف نے کہاکہ پاکستان کے عوام ان بہادر سپوتوں کی عظیم قربانیوں کے ہمیشہ مقروض رہیں گے۔ وزیر دفاع نے کہاکہ ہمارے بہادر سپوتوں نے افغان سرزمین سے جارحیت کرنے والوں کو بھرپور جواب دیتے ہوئے علاقائی سالمیت کی خاطر اپنی جانوں کا نذرانہ پیش کیا۔ وزیرِ دفاع نے مزید کہاکہ پاکستان کی مسلح افواج قوم کی مکمل حمایت کے ساتھ وطنِ عزیز کے خلاف ہر قسم کی جارحیت اور سازش کو ناکام بنانے کے لیے پُرعزم ہیں۔
واضح رہے کہ افغان طالبان, بھارتی اسپانسرڈ فتنۃ الخوارج کی جانب سے پاکستان کے خلاف جارحیت کا پاک فوج نے بھرپور جواب دیا ہے، جس میں 200 سے زیادہ افغان طالبان, بھارتی اسپانسرڈ فتنۃ الخوارج دہشتگرد ہلاک ہوئے۔ جبکہ اس دوران وطن کے 23 جوانوں نے جام شہادت نوش کیا۔
