لاہور ستمبر20 (ٹی این ایس )لاہورمیں شہری پٹرول کی تلاش میں جگہ جگہ مارے مارے پھر رہے ہیں ، پٹرول پمپس پر شہریوں کی لمبی قطاریں لگی ہوئی ہیں ۔ وزارت پٹرولیم کی جانب سے یقین دہانیوں کے باوجود لاہور کے کئی علاقوں سے پٹرول نایاب ہوگیا ہے ۔شہر کے کئی پٹرول پمپس پر پٹرول دستیاب نہیں کے بورڈز آویزاں کر دیئے گئے ہیں اور شہریوں کی منتوں اور فریادوں کے باوجود انہیں پٹرول نہیں دیا جا رہا ۔ اسی دوران مختلف پٹرول پمپس پر مالکان اور شہریوں کے درمیان تلخ کلامی بھی ہوئی اور تلخ جملوں کا تبادلہ بھی ہوا۔۔جن پٹرول پمپس پر پٹرول دستیاب ہے وہاں شہریوں کی لمبی قطاریں لگی ہوئی ہیں اور شہری شدید گرمی میں اپنی گاڑیوں اور موٹر سائیکلوں میں پٹرول لینے کیلئے بے بسی کی تصویر بنے ہوئے ہیں ۔ ذرائع کا کہنا ہے کہ دوسرے شہروں سے لاہور آنے والی پٹرول کی سپلائی شدید متاثر ہوئی ہے ، دوسرے شہروں سے پٹرول لے کر لاہور آنے والے کنٹینرز لاہور نہیں پہنچ سکے۔
