راولپنڈی (ٹی این ایس) کھیلتا پنجاب پنک گیمز کیلئے خواتین ٹرائلز کے تیسرے روز راولپنڈی ڈویژن کی باکسنگ، باسکٹ بال، ٹیبل ٹینس، تائیکوانڈو اور ووشو ٹیموں کے ٹرائلز مکمل ہوگئے۔ ڈی او سپورٹس راولپنڈی وحید احمد، ڈی ایس او شمس توحید عباسی، عامر اوصاف و دیگر سپورٹس افسران اور ایسوسی ایشنوں کے آفیشلز کی زیرنگرانی ٹرائلز شہبازشریف سپورٹس کمپلیکس راولپنڈی میں ہوئے، اس موقع پر ایڈیشنل کمشنر (جنرل) طلحہ نعیم تابانی مہمان خصوصی تھے۔ ٹرائلز میں راولپنڈی ڈویژن کے تمام چھ اضلاع راولپنڈی، اٹک، جہلم، چکوال، تلہ گنگ اور مری سے سینکڑوں انڈر21 خواتین کھلاڑیوں نے حصہ لیا جن میں سے ٹیموں کا انتخاب کیا گیا۔ واضح رہے کہ ٹرائلز کے پہلے دو روز کراٹے، ماس ریسلنگ، آرچری، اتھلیٹکس، بیڈمنٹن اور والی بال ٹیموں کا انتخاب عمل میں لایا گیا۔ راولپنڈی ڈویژن ویمن ہاکی ٹیم کے ٹرائلز آج بروز جمعرات دانش ہائی سکول جنڈ ضلع اٹک میں ہوں گے۔
