کراچی (ٹی این ایس)سندھ — اقوام متحدہ کے عالمی ادارہ برائے خوراک و زراعت (ایف اے او) نے ورلڈ فوڈ پروگرام (ڈبلیو ایف پی) کے اشتراک اور یورپی یونین کے ڈائریکٹوریٹ جنرل فار یورپی سول پروٹیکشن اینڈ ہیومینیٹیرین ایڈ آپریشنز (ڈی جی ایکو) کے تعاون سے جاری “انٹیگریٹڈ ڈیزاسٹر پریپیئرڈنیس فار ریزیلینس بلڈنگ” منصوبے کے تحت خیرپور ضلع میں پیشگی اقدامات (اینٹیسیپیٹری ایکشن) کے لیے کانٹیکسٹ اینالیسز کے سلسلے میں کراچی میں ایک صوبائی مشاورتی اجلاس منعقد کیا۔
اجلاس میں حکومت سندھ کے مختلف محکموں بشمول زراعت، لائیو اسٹاک، آبپاشی، ڈیزاسٹر مینجمنٹ، جامعات، سول سوسائٹی تنظیموں، انسانی امدادی اداروں اور اقوام متحدہ کے اداروں کے نمائندگان نے شرکت کی تاکہ ضلع خیرپور میں درپیش خطرات، کمزوریوں، ادارہ جاتی مسائل اور کمیونٹی کی استعداد کا مشترکہ جائزہ لیا جا سکے۔
مشاورتی اجلاس کا مقصد موسمیاتی خطرات خصوصاً خشک سالی، سیلاب اور ہیٹ ویوز کے تناظر میں خیرپور کے لیے حساس اور مقامی حالات سے ہم آہنگ پیشگی اقدامات کی منصوبہ بندی میں معاونت فراہم کرنا تھا۔ اجلاس کے دوران شرکاء نے غذائی تحفظ، موسمیاتی دباؤ، حکمرانی کے مسائل اور سماجی و معاشی کمزوریوں پر تبادلہ خیال کیا جبکہ مقامی سطح پر تیاری اور بحالی کے نظام کو مضبوط بنانے کے امکانات کا بھی جائزہ لیا گیا۔
ورکشاپ کے دوران مختلف گروپس میں شرکاء نے مشاورتی سرگرمیوں میں حصہ لیتے ہوئے موجودہ خطرات اور کمزوریوں سے متعلق معلومات کی توثیق کی۔ مباحثوں میں کمزوریوں کے اسباب، سماجی تقسیم اور روابط، اور اہم کردار ادا کرنے والے فریقین کی نشاندہی کی گئی، جبکہ موجودہ اور آفات کے بعد کی صورتحال کا تقابلی جائزہ بھی لیا گیا۔ اس عمل میں خاص طور پر اس بات پر توجہ دی گئی کہ قدرتی آفات غذائی تحفظ، سماجی ہم آہنگی، زمین و پانی جیسے وسائل تک رسائی اور مجموعی سماجی ڈھانچے کو کس طرح متاثر کرتی ہیں۔
شرکاء نے آفات سے نمٹنے اور پیشگی اقدامات کے نظام میں موجود ادارہ جاتی اور انتظامی چیلنجز پر بھی گفتگو کی اور ماضی کے امدادی و بحالی پروگراموں سے حاصل ہونے والے تجربات کا جائزہ لیا۔ تنازعات سے حساس نقطہ نظر کے تحت اس بات پر زور دیا گیا کہ پیشگی اقدامات ایسے انداز میں ترتیب دیے جائیں جو کسی بھی قسم کی محرومی، عدم مساوات یا سماجی تناؤ کو بڑھانے کے بجائے کمزور طبقات تک منصفانہ رسائی کو یقینی بنائیں۔
اجلاس کے دوران مختلف اداروں کے کردار، رابطہ کاری میں موجود خلا، ابتدائی انتباہی اشاروں اور ممکنہ پیشگی اقدامات پر بھی تبادلہ خیال کیا گیا۔ اس مشاورتی عمل سے حاصل ہونے والی سفارشات جاری کانٹیکسٹ اینالیسز میں شامل کی جائیں گی تاکہ خیرپور کے لیے ایسے پیشگی عملی پروٹوکولز تیار کیے جا سکیں جو موسمیاتی خطرات کے اثرات کو کم کرنے، روزگار کے تحفظ، غذائی تحفظ اور کمیونٹی کی مجموعی بحالی کی صلاحیت کو مضبوط بنانے میں مددگار ثابت ہوں۔
“انٹیگریٹڈ ڈیزاسٹر پریپیئرڈنیس فار ریزیلینس بلڈنگ” منصوبہ حکومت کے مختلف اداروں کی صلاحیتوں کو مضبوط بنانے، بروقت اقدامات کے نظام کو بہتر بنانے اور سندھ میں موسمیاتی خطرات سے متاثرہ کمیونٹیز کے لیے پائیدار اور مضبوط زرعی و غذائی نظام کے فروغ کے لیے مشترکہ کاوشوں کو فروغ دینے پر مرکوز ہے۔
