جازان ،اکتو بر10(ٹی این ایس): زرائع کے مطابق پراسیکیوشن جازان ریجن میں رہائشی عمارت میں آگ لگنے کے واقعے کی تحقیقات کر رہی ہے۔ انہیں شبہ ہے کہ رہائشی عمارت میں آگ لگنے کے پیچھے کوئی بڑی وجہ ہے کیونکہ عمارت سے ایک لڑکی اور 3 بچوں کی برہنہ نعشیں ملی ہیں۔ بعض کے ہاتھ پیر بندھے ہوئے تھے۔ بچوں کی ماں کو گرفتار کرلیا گیا ہے۔ خاتون نے شہری دفاع کے اہلکاروں کو امدادی کارروائی سے جان بوجھ کر روکا تھا۔ انہیں اس گھر میں داخل نہیں ہونے دیا تھا جس میں ایک بچی اور تین بچے آگ سے جھلس کرہلاک ہوئے۔ جازان ریجن میں شہری دفاع کے ترجمان یحییٰ القحطانی نے بتایا کہ ہلاک ہونے والے بچوں کے باپ سے بھی پوچھ گچھ کی جارہی ہے۔ وہ اسپتال میں زیر علاج ہے۔ ایک بچہ اور بچی بھی اسپتال میں زیرعلاج ہیں۔
