رباط، 18 اکتوبر 2026ء (ٹی این ایس):مراکش کے بادشاہ محمد ششم کی زیرِ صدارت اجلاس، مالیاتی قانون 2027ء کی پانچ اہم ترجیحات کا جائزہ
مراکش کے مالیاتی قانون 2027ء میں نوجوانوں کے لیے تعلیم، تربیت اور روزگار کے مواقع بڑھانے، عوام کی قوتِ خرید کے تحفظ اور نجی سرمایہ کاری کے فروغ پر خصوصی توجہ دینے کی تجویز
مراکش کے بادشاہ محمد ششم نے ولی عہد شہزادہ مولائے الحسن کے ہمراہ رباط کے شاہی محل میں وزارتی کونسل کے اجلاس کی صدارت کی، جس میں مالیاتی قانون 2027ء کے مسودے کی عمومی رہنما اصولوں کا جائزہ لیا گیا۔
اجلاس میں وزیرِ معیشت و مالیات نے بتایا کہ عالمی اقتصادی چیلنجز کے باوجود مراکش کی معیشت میں رواں سال 4.7 فیصد ترقی متوقع ہے، جبکہ مہنگائی کی شرح 0.7 فیصد اور بجٹ خسارہ مجموعی قومی پیداوار کے 3 فیصد تک رہنے کا تخمینہ ہے۔
مجوزہ مالیاتی قانون میں پانچ بنیادی ترجیحات مقرر کی گئی ہیں۔ پہلی ترجیح عوام کی قوتِ خرید کا تحفظ، صحت کی سہولیات کی توسیع اور سماجی امداد میں بہتری ہے۔ دوسری ترجیح نوجوانوں کے لیے تعلیم، پیشہ ورانہ تربیت، روزگار اور کاروباری مواقع فراہم کرنا ہے، جس کے لیے 2027ء سے 2031ء تک ایک جامع قومی پروگرام شروع کرنے کی تجویز ہے۔
تیسری ترجیح علاقائی اختیارات کو مضبوط بنانا اور مربوط ترقیاتی پروگراموں پر عمل درآمد تیز کرنا ہے، تاکہ مختلف علاقوں میں متوازن ترقی کو فروغ دیا جا سکے۔ چوتھی ترجیح پانی، توانائی، خوراک اور ڈیجیٹل شعبوں میں قومی خودمختاری کو مضبوط بنانا، قابلِ تجدید توانائی اور گرین ہائیڈروجن کے منصوبوں کو آگے بڑھانا ہے۔
پانچویں ترجیح ایک مضبوط اور مسابقتی معیشت کی تعمیر، نجی سرمایہ کاری میں اضافہ، چھوٹے اور درمیانے درجے کے کاروباروں کی معاونت اور مالیاتی استحکام برقرار رکھنا ہے۔
مجوزہ منصوبے کے تحت مربوط علاقائی ترقیاتی پروگراموں کے لیے تقریباً 25 ارب مراکشی درہم مختص کرنے کی تجویز بھی پیش کی گئی ہے۔ مجموعی طور پر مالیاتی قانون 2027ء کا مقصد اقتصادی ترقی، سماجی بہبود، نوجوانوں کے روزگار اور قومی وسائل کے مؤثر استعمال کو فروغ دینا ہے۔
