واشنگٹن نومبر 23(ٹی این ایس)امریکا نے بھی روہنگیا مسلمانوں پر ڈھائے جانے والے مظالم کو نسل کشی قرار دے دیا۔غیرملکی خبررساں ادارے کے مطابق ایک بیان میں امریکی وزیر خارجہ ریکس ٹلرسن نے کہاکہ حقائق بتاتے ہیں کہ میانمار روہنگیا مسلمانوں کی نسل کشی کر رہا ہے۔انہوں نے مزید کہا کہ حقائق کے جائزے کے بعد واضح ہے کہ حکومت روہنگیا کی نسل کشی کر رہی ہے، کسی قسم کی بھی اشتعال انگیزی روہنگیا پر جاری افسوسناک مظالم کی توجیہہ نہیں ہوسکتی۔امریکی وزیر خارجہ کا یہ بھی کہنا تھا کہ برمی فوج، سیکیورٹی فورسز اور مقامی ملیشیا کے مظالم نے لاکھوں روہنگیا مسلمانوں کو اپنے گھروں کو چھوڑنے پر مجبور کیا ہے۔واضح رہے کہ امریکی وزیر خارجہ ریکس ٹلرسن نے گزشتہ ہفتے میانمار کا دورہ کیا تھا۔
