اسلام آباد دسمبر 9(ٹی این ایس) سابق چیئرمین ایس ای سی پی ظفر حجازی نے مقدمہ خارج کرنے کیلئے اسلام آباد ہائی کورٹ سے رجوع کر لیا ۔میڈیا رپورٹ کے مطابق ریکارڈ ٹمپرنگ کیس کے ملزم اور سابق چیئرمین ایس ای سی پی ظفر حجازی نے اسپیشل جج سینٹرل کے فیصلے کے خلاف اسلام آباد ہائیکورٹ میں درخواست دائرکردی ہے ۔ظفرحجازی کی جانب نے دائر درخواست میں موقف اختیار کیا گیا کہ ٹرائل کورٹ نے حقائق اور قوانین کو نظر انداز کر کے مقدمے خارج کرنے کی درخواست مسترد کی ہے۔درخواست میں عدالت سے استدعا کی گئی کہ مقدمہ بے بنیاد ہے ،لہذا اسے ختم کیا جائے، ظفر حجازی نے درخواست میں وفاق اور اسپیشل جج سینٹرل کو فریق بنایا ہے جنہوں نے سابق چیئرمین ایس ای سی پی کی مقدمہ خارج کرنے کی درخواست مسترد کر دی تھی۔واضح رہے کہ دس نومبر کو اسلام آباد کی خصوصی عدالت نے چوہدری شوگر ملز ریکارڈ ٹیمپرنگ کیس میں سابق چیئرمین ایس ای سی پی ظفرحجازی کی بریت کی درخواست مسترد کرتے ہوئے ان کے خلاف ٹرائل شروع کرنے کا حکم دیا تھا۔
