اسلام آبادجنوری 11(ٹی این ایس) صدر مملکت ممنون حسین نے پالیسیوں میں تسلسل کے ذریعے قومی آمدنی اور ترقی کی رفتار میں مزید اضافے کی ضرورت پر زور دیتے ہوئے کہا ہے کہ اس سلسلہ میں پاکستان کی صنعتی و تجارتی برادری سمیت تمام طبقات کو اپنے اپنے حصے کا کردار ادا کرنا چاہیے، گزشتہ چند برسوں کے دوران قومی پیداوار میں شاندار اضافہ ہوا ہے جس سے معیشت بہتر ہوئی۔
انہوں نے یہ بات راولپنڈی چیمبرز آف کامرس اینڈ انڈسٹری کے وفد سے بات چیت کرتے ہوئے کہی جس نے جمعرات کو چیمبر کے صدر زاہد لطیف خان کی قیادت میں اٴْن سے ملاقات کی۔ اس موقع پر ایوان صدر اور وزارت تجارت کے اعلیٰ حکام بھی موجود تھے۔ صدر مملکت نے کہا کہ قومی معیشت کے استحکام کے لیے معاشی پالیسیوں کا تسلسل ضروری ہے۔ یہ امر باعث اطمینان ہے کہ موجودہ حکومت اسی حکمت عملی کے تحت کام کر رہی ہے۔صنعت وتجارت اور معاشی شعبے پر اس کے اثرات مثبت ہو ں گے۔ انہوں نے ٹیکس کی شرح میں کمی کے فیصلے کو معیشت کی بہتر ی کے لیے مثبت قرار دیتے ہوئے کہا کہ اس سے قومی آمدنی میں اضافہ ہو گا۔ صدر مملکت نے مزید کہا کہ گزشتہ چار برس کے دوران قومی ترقی کی شرح میں اضافہ ہوا ہے جو قابل اطمینان ہے۔ بدعنوانی میں کمی ہوئی ہے جس کے مثبت اثرات مرتب ہو رہے ہیں۔
انہوں نے وفد کو بتایا کہ ملک میں بجلی کی پیداوار میں اضافہ ہو چکا ہے، لوڈ شیڈنگ پر قابو پایا جا چکا ہے جس کے بعد بجلی کی قیمتوں میں کمی بھی کی جائے گی۔ انھوں نے توانائی کی پیداوار کے سلسلے میں ایل این جی کی درآمد پر بھی اطمینان کرتے ہوئے کہا کہ اس سے مسائل پر قابو پانے میں مدد ملی ہے۔ صدر مملکت نے کہا کہ حکومت کی پالیسیاں درست سمت میں ہیں لیکن اس سلسلے میں ملک کی تاجر اور صنعتکار برادری کو وزارت تجارت سے مسلسل رابطے میں رہنا چاہیے تاکہ پالیسیوں میں مزید بہتر لائی جا سکے۔صدر مملکت نے کہا کہ چیمبرز آف کامرس اور دیگر تجارتی اداروں کو چاہیے کہ وہ مختلف شعبوں میں تحقیق کو فروغ دیں تاکہ دنیا میں پیدا ہونے والے رجحات کا جائزہ لے کر قومی صنعت و تجارت کے لیے نئی راہوں کا تعین کر سکے۔ صدر مملکت نے مزید کہا کہ محض ذاتی اور سیاسی اختلاف کی وجہ سے ترقیاتی عمل سے اختلاف اور کامیابیوں کا انکار نامناسب ہے۔ معاشرے کے مختلف طبقوں کو اس کی حوصلہ شکنی کرنی چاہیے تاکہ ملک میں ترقی رفتار تیز ہو سکے۔
انہوں نے کہا کہ پاکستان کا کاروباری طبقہ قومی معیشت کے ستون کی حیثیت رکھتا ہے، حکومت صنعت وتجارت کے فروغ کے لیے اس شعبے کے تمام مسائل کے حل میں پوری طرح سنجیدہ ہے۔ انہوں نے کہا کہ اس حکمت عملی کے مثبت نتائج برآمد ہو رہے ہیں۔