اسلام آباد جنوری 11(ٹی این ایس) الیکشن کمیش آف پاکستان (ای سی پی) میں ڈپٹی میئر کراچی ارشد وہرہ نے متحدہ قومی موومنٹ (ایم کیو ایم) پاکستان کے سربراہ ڈاکٹر فاروق ستار کی جانب سے انہیں ڈی سیٹ کرنے کے حوالے سے دائر درخواست پر جواب جمع کرانے کے لیے مہلت مانگ لی۔چیف الیکشن کمشنر کی سربراہی میں پانچ رکنی بینچ نے ڈپٹی مئیر کراچی ارشد وہرہ کو ڈی سیٹ کرنے کے حوالے سے دائر درخواست پر سماعت کی۔
خیال رہے کہ ایم کیو ایم سربراہ ڈاکٹر فاروق ستار نے لوکل گورنمنٹ ایکٹ 2013 کے سکیش 36 کے، کے تحت ارشد وہرہ کے خلاف الیکشن کمیشن میں درخواست دائر کی تھی۔ڈپٹی میئر کراچی کی جانب سے ان کے وکیل حفیظ الدین ایڈووکیٹ الیکشن کمیشن میں پیش ہوئے جبکہ ایم کیو ایم کے سربراہ کی جانب سے ان کے وکیل اقبال قادری الیکشن کمیشن میں پیش ہوئے۔حفیظ الدین ایڈووکیٹ نے الیکشن کمیشن کو بتایا کہ جواب میرے پاس تیار ہے جبکہ کچھ دستاویزات لیٹ ملے ہیں۔انہوں نے الیکشن کمیشن سے درخواست کی کہ کچھ مہلت دی جائے مکمل جواب تیار کر کے جواب جمع کرا دیتا ہوں۔انہوں نے کہا کہ ابھی میرے پاس جواب نا مکمل ہے لیکن اگر آج سماعت کرنا چاہتے ہیں تو جواب جمع کرا دیتا ہوں۔
انہوں نے کہا کہ جواب نا مکمل ہے تحریری جواب کے ساتھ شواہد بھی لگانا چاہتا ہوں۔ایم کیو ایم کے وکیل ایس اے اقبال قادری نے الیکشن کمیشن سے درخواست کی کہ ہمیں بھی تیاری کے لیے جواب کی کاپی 3 سے 4 دن پہلے فراہم کی جائے جس پر ارشد ووہرا کے وکیل کا کہنا تھا کہ میں اپنے جواب اور شواہد میں ثابت کروں گا کہ ایم کیو ایم سے ایم کیو ایم پاکستان کیسے بنی۔الیکشن کمیشن کے باہر ڈپٹی میئر کراچی ارشد ووہرا کے وکیل حفیظ الدین نے میڈیا سے گفتگو کرتے ہوئے کہا کہ ہم نے جو دستاویزات مانگیں وہ تاخیر سے ملیں۔انہوں نے کہاکہ معاملہ سادہ ہے ایم کیو ایم پاکستان نے غیر قانونی ترامیم کیں اور اس پر آئین کا آرٹیکل 62 اور 63 لگے گی۔
انہوں نے کہا کہ ہم ایم کیو ایم لندن کے خلاف بھی قانونی چارہ جوئی چاہتے ہیں۔دوسری جانب ایم کیو ایم کے وکیل بیرسٹر سیف نے بھی الیکشن کمیشن کے باہر میڈیا سے گفتگو کرتے ہوئے کہا کہ ارشد ووہرا کے وکیل نے جواب جمع کرانے کے لیے مہلت مانگی ہے۔انہوکں نے کہا کہ یہ وہی ایم کیو ایم ہے جس کے ٹکٹ پر ارشد ووہرا ڈپٹی میئر بنے، اگر ایم کیو ایم غیر قانونی جماعت ہے تو ان لو ڈپٹی میئر نہیں بننا چاہیے تھا۔انہوں نے کہا کہ سیاسی الزام تراشی کی جا رہی ہے اور وقت ضائع کیا جا رہا ہے جبکہ ایم کیو ایم پاکستان نے تمام دستویزات الیکشن کمیشن میں جمع کرا دیے ہیں۔قصور واقعہ کی مذمت کرتے ہوئے انہوں نے ملزمان کی جلد از جلد گرفتاری کا مطالبہ کردیا۔انہوں نے کہاکہ سیاسی جماعتیں سیاسی مطالبات کرتی ہیں جبکہ اس ایشو پر سیاسی بیان بازی نہیں کی جانا چاہیے۔انہوں نے کہا کہ ڈر ہے سیاسی بیان بازی میں کہیں قاتل نہ بچ جائے۔
