کل 179,210 میں سے 67 فیصدپاکستانی سرکاری سکیم جبکہ باقی 33 فیصد نجی سکیم کے تحت حج ادا کریں گے ٗوزیر مذہبی امور کا انٹرویو
اسلام آباد ،جنوری 15 (ٹی این ایس):وفاقی وزیر مذہبی امور و بین المذاہب ہم آہنگی سردار محمد یوسف نے کہا ہے کہ رواں سال سرکاری حج سکیم کے تحت حج پر جانے والے شمالی علاقے کے زائرین سے 280,000 روپے لیے جائیں گے ٗکل 179,210 پاکستانی مقدس مذہبی فریضہ ادا کریں گے جن میں سے67 فیصد سرکاری سکیم کے تحت ٗ باقی 33 فیصد نجی سکیم کے تحت حج ادا کریں گے۔
ایک انٹرویومیں انہوں نے کہا کہ اس سال سرکاری حج سکیم کے تحت حج پر جانے والے شمالی علاقے کے زائرین سے 280,000 روپے لیے جائیں گے جبکہ جنوبی علاقے کے حجاج کرام سے270,000 روپے وصول کیے جائیں گے۔ انہوں نے کہا کہ عوام کی ڈیمانڈ پر حکومتی حج کوٹے کی شرح کو بھی مزید بڑھا دیا گیا ہے۔ انہوں نے کہا کہ اس سال کل 179,210 پاکستانی مقدس مذہبی فریضہ ادا کریں گے جن میں سے 67 فیصد سرکاری سکیم کے تحت جبکہ باقی 33 فیصد نجی سکیم کے تحت حج ادا کریں گے۔
وفاقی وزیر کا کہنا تھا کہ حج 2018ء کے لیے80 سال سے زائد عمر پاکستانیوں کے لیے بھی 10 ہزار کا کوٹہ مختص کیا گیا ہے لیکن اگر یہ درخواستیں 10 ہزار سے زائد ہو گئیں تو پھر خفیہ رائے شماری سے خوش نصیبوں کا انتخاب کیاجائے گا جبکہ وہ درخواست دہندگان جو گزشتہ3 سال سے حج پر جانے میں ناکام رہے ہیں انہیں عام رائے کے ذریعے منتخب کیا جائے گا۔ انہوں نے کہا کہ وہ شخص جو سرکاری سکیم کے تحت پہلے حج ادا کر چکا ہے وہ درخواست دینے کا اہل نہیں لیکن صرف ایک عورت کے ساتھ بطور محرم اسے یہ استثنا حاصل ہے۔
ایک سوال کے جواب میں انہوں نے کہا کہ حکومت حج اور عمرہ سے متعلق ایک بل پارلیمنٹ میں پیش کرے گی اور امید ہے کہ ملک میں آئندہ عام انتخابات سے قبل یہ بل منظور ہو جائے گا۔ سردار محمد یوسف کا کہنا تھا کہ پاکستان مسلم لیگ (ن) کی حکومت گزشتہ 4 سال سے حجاج کرام کو کھانے سمیت میڈیکل، رہائش اور سفر کی بہترین سہولیات فراہم کر رہی ہے۔ انہوں نے کہا کہ وزیراعظم شاہد خاقان عباسی نے متعلقہ وزارت کو حکم دیا ہے کہ وہ حجاج کرام کو زیادہ سے زیادہ سہولیات فراہم کرے اور حجاج کرام کے لیے بہترین ممکنہ انتظامات کرے تاکہ انہیں اپنے مقدس مذہبی فریضے کی ادائیگی میں کسی قسم کی کوئی پریشانی نہ ہو۔ انہوں نے کہا کہ حج پر جانے والوں کے لیے پاسپورٹ جس کی معیاد 20 فروری 2019ء تک ہو، کمپیوٹرائزڈ قومی شناختی کارڈ اور میڈیکل سرٹیفکیٹ لازمی ہو گا۔ انہوں نے کہا کہ حج گروپ آرگنائزرز کا شفاف میکانزم کے ذریعے کوٹہ مختص کیا جائے گا۔ حج گروپ آرگنائزرز کو اپنے پیکج کی کل رقم کا 5 فیصد بطور سیکیورٹی وزارت مذہبی امور میں جمع کرانا ہو گا جو حج کے بعد قابل واپسی ہو گا۔