اسلام آباد ،جنوری18 (ٹی این ایس):پاکستان پیپلز پارٹی کے مرکزی رہنما سابق چیئرمین سینٹ نیئر حسین بخاری نے عمران خان اور شیخ رشید کی جانب سے پارلیمنٹ کے حوالے سے دیئے گئے بیان پر سخت رد عمل کا اظہار کرتے ہوئے کہاہے کہ پارلیمنٹ ریاست کی ماں ہے، پارلیمنٹ کو گالی دینا ریاست کو گالی دینے کے مترادف ہے۔
جمعرات کو پارلیمنٹ ہاؤس میں ذرائع ابلاغ کے نمائندوں سے گفتگو کرتے ہوئے سابق چیئرمین سینٹ اور پیپلز پارٹی کے جنرل سیکرٹری نیئر حسین بخاری نے کہا کہ پارلیمنٹ ریاست کی ماں ہے اور اسے گالی دینا بالکل بھی جمہوری روایات کے خلاف ہے۔ انہوں نے موجودہ حکومت کی پالیسیوں کے حوالے سے کہا کہ منی لانڈرنگ کے کاریگر اسحاق ڈار اب وعدہ معاف گواہ نہیں بلکہ مجرم بن چکے ہیں۔
ایک سوال کے جواب میں انہوں نے کہا کہ دارالحکومت میں جتنی بھی ہاؤسنگ سوسائٹیاں ہیں وہاں قبرستان کیلئے اراضی مختص نہیں کی گئی اور وہاں کے مکین قبرستان کیلئے جگہ ڈھونڈھتے ہیں۔ ایک سوال کے جواب میں انہوں نے کہا کہ سیاست میں روز بروز تبدیلیاں رونما ہوتی ہیں لیکن ہر سیاست دان کو ہمیشہ تول کر بولنا چاہئے۔ شیخ رشید جیسے شخص سے اس بات کی توقع کی جاسکتی ہے کہ وہ پارلیمنٹ کو گالی دے مگر عمران خان جو ملک کی تیسری بڑی سیاسی جماعت کے سربراہ ہیں اور وزیراعظم بننے کا خواب دیکھ رہے ہیں ان کو یہ ہرگز زیب نہیں دیتا کہ وہ اس پارلیمنٹ کو تنقید کا نشانہ بنائیں۔ انہوں نے کہا کہ جس وقت شیخ رشید اور عمران خان نے یہ بیانات دیئے میں وہاں موجود نہیں تھا۔
