اسلام آباد، جنوری 20 (ٹی این ایس):لاہور کے مال روڈ پر کھڑے ہوکر عوامی تحریک کے جلسے میں پی ٹی آئی چیئرمین عمران خان نے پارلیمنٹ پرلعنت بھیجی جبکہ شیخ رشید نے پارلیمنٹ پر لعنت بھیجتے ہوئے مستعفی ہونے کا بھی اعلان کردیا تاہم ابھی تک اس اعلان پر عمل نہیں ہوسکا ، اب عمران خان اور شیخ رشید کی طرف سے پارلیمنٹ سے وصول کی جانیوالی مراعات اور تنخواہوں کی تفصیلات بھی منظرعام پر آگئی ہیں ۔
پارلیمنٹ پر لعن طعن کرنیوالے عمران خان 443دنوں میں سے صرف 20 دن آئے لیکن تنخواہ پوری 57 لاکھ 30 ہزار روپے وصول کی،مراعات کی مد میں آٹھ لاکھ چالیس ہزار روپے کے ٹریول واؤچر بھی وصول کیے ۔ عمران خان کیساتھ لعنتیں بھیجنے والے شیخ رشید نے بھی تنخواہ پوری وصول کی اور13 تیرہ لاکھ 74ہزار کے ٹریول واؤچر چربھی لیے ۔ پی ٹی آئی کے 35ارکان بھی پیچھے نہ رہے جنہوں نے20 کروڑ روپے تنخواہ ،8کروڑ کے ایئرٹکٹس اور چار کروڑ کے ٹریول واؤچر وصول کیے ۔
پارلیمانی سال 2016-17کے دوران پارلیمان کے 102اجلاسوں میں سے صرف 2اجلاس میں عمران خان نے شرکت کی اور تنخواہ کی مد میں 25لاکھ روپے وصول کیے ۔ عمران اور ان کی پارٹی کے ارکان اگست 2014ءسے جون 2015ءتک 10 ماہ ایوان سے غیر حاضر رہے اس کے باوجود غیر حاضر ہر رکن کو ساڑھے آٹھ لاکھ روپے تنخواہ اور مراعات کی مد میں ملے،یہ رقوم ان کے بینک اکاؤنٹس میں منتقل ہوئیں۔
