کراچی،جنوری 24 (ٹی این ایس):حب ریلی کے چیف آرگنائزر شجاعت شیروانی نے کہا ہے کہ حب ریلی کا پانچواں ایڈیشن اتوار 28 جنوری کو حب میں شروع ہوگا، ریلی میں نادر مگسی اور صاحبزادہ سلطان محمد علی سمیت ملک بھر سے50 سے زائد بہترین ریسرز شرکت کرینگے ، مستقبل میں ریلی کو اور بہتر انداز میں منعقد کرنے کیلئے پاکستان میں فارمولہ ون ریسنگ ٹریک بنانے پر غور کررہے ہیں اس حوالے سے ابوظہبی میں فارمولہ ون ریسنگ ٹریک کی انتظامیہ سے ملاقات ہوئی ہے بہت جلد پاکستان میں بھی ٹریک بنانے کے کام کا آغاز ہوگا۔ کراچی میں ٹویوٹا ہائی وے موٹرز کے شو روم میں ڈائریکٹر مارکیٹنگ احسن شیروانی، اور ہیڈ آف سیلز مارکیٹنگ شاد علی خان، رونی پٹیل اور آصف امام کے ہمراہ مشترکہ پریس کانفرنس کرتے ہوئے انہوں نے کہا کہ حب ریلی کے پانچویں ایڈیشن میں آٹھ کیٹیگریز رکھی گئی ہیں، تین اسٹاک ، تین پری پئیرڈ اور خواتین کی دو کیٹیگریزرکھی گئی ہیں، گیارہ کلو میٹر طویل اور خطرناک ٹریک پر پچاس ریسرز تیزرفتاری کے جو ہر دکھائینگے ، آصف امام نے کہا کہ زگ زیگ اور ریتیلے ٹریک کو میکس ڈرٹ ایرینا کا نام دیا گیا ہے، پری پیئرڈ کیٹیگری کے ریسرز دو راؤنڈز مکمل کرینگے راؤنڈ کی بہترین ٹائمنگ والے ریسرز کو فاتح قراردیا جائیگا، اسٹاک کیٹیگری کے مقابلے ایک راؤنڈ پر مشتمل ہونگے۔انہوں نے کہا کہ مقابلوں کو شفاف بنانے کیلئے جی پی آر ایس سسٹم متعارف کروارہے ہیں تاکہ ریسرز کے تحفظات دور کئے جاسکیں ۔ رونی پٹیل کا کہنا تھا کہ پاکستان میں قائم ٹریکس کے حوالے سے آسٹریلیا، جنوبی افریقہ، متحدہ عرب امارات اور تھائی لینڈکے ریسز بھی حیرت کا اظہار کرچکے ہیں ، حکومت ہماری مدد کرے تو ہم اور بھی اچھے ٹریکس بناسکتے ہیں ۔
