لاہور ,فروری 26(ٹی این ایس): ترجمان پنجاب حکومت ملک احمد خان نے کہا ہے کہ ملتان میٹرو بس منصوبے پر چینی کمپنی پہلے ہی معافی مانگ چکی ہے، عمران خان حقائق کو نہیں جھٹلا سکتے۔عمران خان کے بیان پر ردعمل کا اظہار کرتے ہوئے پنجاب حکومت کے ترجمان نے کہا کہ ملتان میٹرو بس منصوبے میں کرپشن کے الزامات لگانے والی کمپنی کو چینی سکیورٹی ریگولیٹری کمیشن نے بلیک لسٹ کر کے جرمانہ عائد کیا، عمران خان مسلسل جھوٹ بولنے کے بجائے اپنی کارکردگی بتائیں۔انہوں نے کہا کہ خیبرپختونخوا میں عمران خان کی کارکردگی صفر جمع صفر ہے اور سرکاری افسران پر بے بنیاد الزامات ان کی ذہنی پستی کا عکاس ہے۔ملک احمد خان نے عمران خان کو مخاطب کرتے ہوئے کہا کہ نیازی صاحب خاطر جمع رکھیں اور 2018 کے انتخابات ان کے لیے نوشتہ دیوار ہے۔خیال رہے کہ عمران خان کا میڈیا سے بات کرتے ہوئے کہنا تھا کہ شہباز شریف کو ہم نے نہیں چین کی ایس ای سی پی نے پکڑا، فیصل سبحان نے ملتان میٹرو میں کرپشن سے متعلق وزیراعلی پنجاب کے خلاف گواہی دی تو اسے غائب کردیا گیا۔عمران خان کا کہنا تھا کہ چین کی ایس ای سی پی کے وفد نے فیصل سبحان کا انٹرویو کیا جنہوں نے بتایا کہ ملتان میٹرو کا پیسا شریف خاندان کے پاس جاتا ہے۔
