کراچی،اپریل 13 (ٹی این ایس):آئی جی سندھ اے ڈی خواجہ نے پولیس کو جاری ہدایات میں کہا ہے کہ شب معراج کے خصوصی موقع پر صوبے بھر میں الرٹ سیکیورٹی اقدامات کو یقینی بنایا جائے، آئی جی سندھ نے تمام ڈی آئی جیزکو ہدایات جاری کی ہیں کہ ضلعی سطح پر باالخصوص مرکزی مساجد، کھلے مقامات، مدارس وغیرہ پرخصوصی شب کی مناسبت سے منعقدہ دعائیہ محافل،وعظ،عبادات کے موقع پر تھانوں کے لحاظ سے ناصرف سیکیورٹی بلکہ رینڈم اسنیپ چیکنگ،موبائل موٹرسائیکل گشت، پکٹنگ نگرانی سمیت ایڈوانس انٹیلی جینس کلیکشن وشیئرنگ کے مجموعی امور کو مذید ٹھوس اور غیر معمولی بنایا جائے۔
انہوں نے کہا کہ مرکزی مساجد پر منتظمین کے تعاون سے فزیکل سرچنگ،بم ڈسپوزل اسکواڈ سے ٹیکنیکل سوئپنگ اور کلیئرنس کے لیئے بھی ہرممکن اقدامات اٹھائے جائیں۔علاوہ اذیں ہرقسم کی پارکنگ مناسب فاصلے پر رکھنے کے ساتھ ساتھ ٹریفک مینجمنٹ اور پارکنگ لاٹس کی نگرانی جیسے امور کو بھی ممکن بنایا جائے، انہوں نے کہا کہ تھانہ جات کی سطح پر پولیس ڈپلائمنٹ نمایاں رکھنے کے علاوہ پولیس افسران اور جوانوں کو ڈیوٹی پوائنٹس ہرگزخالی نہ چھوڑنے کا بھی پابند بنایا جائے تاکہ رات گئے گھروں کو واپس جانیوالے شہریوں کی سیکیورٹی کو یقینی بنایا جاسکے۔
