کوئٹہ اپریل 24(ٹی این ایس): بلوچستان کے دارالحکومت میں 3 خود کش دھماکوں کے نتیجے میں 5 اہلکار شہید جبکہ 7 زخمی ہوگئے، سیکیورٹی فورسز نے بروقت کارروائی کرتے ہوئے 2 حملہ آوروں کو جوابی فائرنگ کر کے ہلاک کردیا۔پولیس ذرائع کے مطابق کوئٹہ کے علاقے میاں غنڈی میں دہشت گردوں نے بم دھماکا کیا اور اُس کے بعد فائرنگ کا سلسلہ شروع ہوا، پولیس کی جانب سے جوابی فائرنگ کے دوران خودکش حملہ آور نے خود کو دھماکے سے اڑالیا۔دھماکے کے بعد سیکیورٹی فورسز نے علاقے کو گھیرے میں لے کر سرچ آپریشن شروع کیا تو دوسری جانب دہشت گردی کے نتیجے میں جاں بحق و زخمی ہونے والے افراد کو ایمبولینسس کے ذریعے کوئٹہ کے سی ایم ایچ اسپتال منتقل کیا گیا۔
اب تک موصول ہونے والی اطلاعات کے مطابق دہشت گردوں نے ایف سی چیک پوسٹ کو نشانہ بنانے کی کوشش کی جو ناکام رہی، سیکیورٹی فورس نے بروقت کارروائی کرتے ہوئے شرپسند عناصر کے مذموم مقاصد کو خاک میں ملا دیا۔ڈی جی سول ڈیفنس کے مطابق جائے وقوعہ سے دو لاشیں برآمد ہوئیں جو ممکنہ طور پر خود کش حملہ آوروں کی ہوسکتی ہیں تاہم دھماکے کے نتیجے میں کوئی اہلکار شہید نہیں ہوا۔سیکیورٹی فورسز اور اہلکاروں کے درمیان فائرنگ کا سلسلہ جاری تھا کہ اسی دوران علاقہ ایک بار پھر زور دار دھماکے سے گونج اٹھا، نمائندہ اے آر وائی مصطفیٰ خان ترین کے مطابق سیکیورٹی فورسز کا قافلہ ایئرپورٹ روڈ پر رواں دواں تھا کہ اسی دوران تیسرا دھماکا ہوا جس کے نتیجے میں متعدد افراد زخمی ہوئے۔ قانون نافذ کرنے والے اداروں نے جائے وقوعہ کو گھیرے میں لے کر شواہد اکھٹے کرنے شروع کردیے جبکہ زخمیوں کو اسپتال منتقل کیا گیا۔پاک فوج کے شعبہ تعلقات عامہ سے جاری بیان کے مطابق کوئٹہ میں ہونے والے تین دھماکوں میں 5 اہلکار شہید اور 7 زخمی ہوئے جبکہ سیکیورٹی فورسز نے بروقت کارروائی کرتے ہوئے جوابی فائرنگ میں 2خودکش حملہ آوروں کو ہلاک کیا۔
