لاہور13جون(ٹی این ایس) ڈائریکٹر جنرل اوورسیز پاکستانیز کمیشن(اوپی سی) پنجاب عثمان انور نے کہا ہے کہ او پی سی سمندر پار مقیم پاکستانیوں کی شکایات کے ازالے کے لئے اہم اور متحرک کردار ادا کر رہا ہے۔ افسران کے پندرہ روزہ اجلاس کی صدارت کرتے ہوئے انہوں نے کہا کہ اوور سیز پاکستانیوں کے مسائل کے حل کیلئے ایک مربوط اور جامع پالیسی پر عمل درآمد جاری ہے۔ اجلاس کے دوران اوور سیزپاکستانیوں کی زیر التواء شکایات کے متعلق تفصیلی غورو خو ض کیا گیا اور ڈائریکٹر جنرل او پی سی نے متعلقہ ڈیلنگ افسران کو ان کے جلد حل کے ضمن میں ضروری ہدایات جاری کیں ۔ اس موقع پر اوور سیز پاکستانیوں کی شکایات کی مانٹیرنگ، درجہ بندی اور جلد حل کے حوالے سے ڈائریکٹر ریونیو اور ڈائریکٹر لیگل او پی سی کی سربراہی میں دو کمیٹیاں تشکیل دی گئیں۔ اجلاس کے دوران او پی سی پورٹل کو مزید آسان بنانے کے حوالے سے مجوزہ تبدیلیوں کے متعلق بھی تبادلہ خیال کیا گیا۔ ڈائریکٹر ز اسد نعیم ، راجہ زبیر ، عشرت اللہ نیازی اور دیگر افسران اجلاس میں شریک ہوئے۔
