اسلام آباد جولائی 25(ٹی این ایس)الیکشن کمیشن نے تحریک انصاف کے سربراہ عمران خان کو ضابط اخلاق کی خلاف ورزی پر 30جولائی کو طلب کرلیا ہے ۔عمران خان نے این اے 53 اسلام آباد میں کیمروں ا ور لوگوں کی موجودگی میں بلے پر مہر لگائی ۔ووٹ کی رازداری کے ضابطے کی خلاف ورزی پر الیکشن کمیشن نے پی ٹی آئی چیئرمین کو نوٹس جاری کردیا ۔تحریک انصاف کے سربراہ کو 30جولائی کو الیکشن کے ضابطہ اخلاق کی سنگین خلاف ورزی اور مروجہ طریقہ کار اختیار نہ کرنے پر جواب طلبی کی جائے گی ۔پی ٹی آئی چیئرمین نے کیمروں اور وہاں موجود لوگوں کی موجودگی میں کھلے عام اپنے پارٹی کے انتخابی نشان ’بلے‘ پر مہر لگائی اور ووٹ ڈالتے ہوئے خفیہ طریقہ کار کا خیال نہیں رکھا۔
خیال رہے کہ خفیہ رائے دہی میں ووٹر کو بوتھ کے پیچھے جاکر اپنے نمائندے کے نشان پر اسٹمپ لگانا ہوتی ہےلیکن عمران خان نے کیمروں اور اپنے ساتھ آئے ہوئے کارکنوں کے سامنے ہی بلے پر اسٹمپ لگائی جسے کیمروں کی آنکھ نے محفوظ کیا۔دوسری جانب ووٹ کی راز داری برقرار نہ رکھنے کے معاملے پر الیکشن کمیشن نے عمران خان کو نوٹس جاری کردیا ہے۔الیکشن کمیشن نے نوٹسز میں کہا ہے کہ وہ 30 جولائی کو الیکشن کمیشن میں ذاتی حیثیت یا وکیل کے ذریعے پیش ہو کر وضاحت دیں۔ادھر پاکستان تحریک انصاف کے رہنما سینیٹر فیصل جاوید خان کا کہنا ہے کہ اس معاملے میں الیکشن کمیشن نے عمران خان کو نوٹس جاری کیا ہے لیکن الیکشن عملے کا کام تھا کہ وہ ووٹر کو کیسے سہولت فراہم کرتا ہے۔انہوں نے کہا کہ سیکرٹ بیلٹ کے حوالے سے عمران خان کی غلطی نہیں تھی کیوں کہ وہاں اتنی بڑی تعداد میں میڈیا آگیا تھا، انہیں روکنا عملے کا کام تھا۔
