کوئٹہ جولائی17(ٹی این ایس)وزیراعلیٰ بلوچستان نواب ثناء اللہ خان زہری نے پشاورمیں ایف سی کی گاڑی کے قریب ہونے والے خودکش دھماکے کی شدید الفاظ میں مذمت کرتے ہوئے دہشت گردی کی اس بزدلانہ کاروائی میں میجرجمال شیران اوردوسیکیورٹی اہلکاروں کی شہادت پر دُکھ اورافسوس کا اظہارکیاہے۔اپنے ایک بیان میں وزیراعلیٰ نے سیکیورٹی فورسز کی قربانیوں کوخراج عقیدت پیش کرتے ہوئے شہدأ کے خاندانوں سے تعزیت اورہمدردی کااظہاربھی کیاہے اورکہاہے کہ ہمارے بہادرسیکیورٹی فورسز کے افسروں اورجوانوں کی قربانیاں رائیگاں نہیں جائیں گی اوربزدل دہشت گردوں اوران کے سرپرستوں کو ان کے انجام تک پہنچانے کیلئے کوئی کسر اٹھانہیں رکھی جائے گی۔وزیراعلیٰ نے کہاکہ بلوچستان کے فرزند میجرجمال شیران اوران کے ساتھیوں نے وطن عزیز کی خاطر جانوں کا نذرانہ پیش کرکے دہشت گردوں کو واضع پیغام دیاہے کہ وہ ہمیں خوف زدہ نہیں کرسکتے اورپوری قوم وسیکیورٹی فورسز اپنے ملک کے دفاع اوردہشت گردی کے خاتمے کیلئے متحد اورپُرعزم ہیں۔وزیراعلیٰ نے شہدأ کے درجات کی بلندی اورلواحقین کیلئے صبرجمیل کی دُعاکی ہے
