اسلام آباد ۔ 5 مارچ (ٹی این ایس) وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ ہر مسلمان عورت کا رول ماڈل حضرت فاطمة الزہراکی سیرت طیبہ اور امہات المومنین جیسی جلیل القدر ہستیاں ہیں، اِسلامی تاریخ کے یہ روشن کردار ہمارے لئے مشعل ِراہ ہیں، وزیر اعظم عمران خان کی قیادت میں موجودہ حکومت خواتین کے ہر قسم کے استحصال کے خلاف ہے اور ان کے آئینی، قانونی، سیاسی، سماجی اور معاشی حقوق کے تحفظ کیلئے پرعزم ہے، خاتون کی عزت و وقار اس کی حیا ہے، میڈیا یا کسی بھی فورم پہ عورت کی تضحیک و تذلیل ناقابلِ قبول رویہ ہے۔ ان خیالات کا اظہار انہوں نے جمعرات کو اپنے ٹویٹ میں کیا۔ ڈاکٹر فردوس عاشق اعوان نے کہا کہ پہلی مسلمان خاتون حضرت خدیجہ الکبریٰ تجارت پیشہ تھیں، ہر مسلمان عورت کا رول ماڈل حضرت فاطمة الزہراکی سیرت طیبہ اور امہات المومنین جیسی جلیل القدر ہستیاں ہیں۔ انہوں نے کہا کہ اِسلامی تاریخ کے یہ روشن کردار ہمارے لئے مشعل ِراہ ہیں۔ معاون خصوصی برائے اطلاعات و نشریات نے کہا کہ وزیر اعظم عمران خان کی قیادت میں موجودہ حکومت خواتین کے ہر قسم کے استحصال کے خلاف ہے اور ان کے آئینی، قانونی، سیاسی ، سماجی اور معاشی حقوق کے تحفظ کیلئے پرعزم ہے۔ انہوں نے کہا کہ عورتوں کے حق وراثت سے لے کر زینب الرٹ بل کی منظوری تک کے اقدامات عورتوں کے حقوق کیلئے حکومت کے پختہ عزم اور سوچ کا واضح اظہار ہے۔ ڈاکٹر فردوس عاشق اعوان نے کہا کہ وجود کی نمائش خود عورت کی توہین ہے۔ انہوں نے کہا کہ خاتون کی عزت و وقار اس کی حیا ہے۔ معاون خصوصی نے کہا کہ میڈیا یا کسی بھی فورم پہ عورت کی تضحیک و تذلیل ناقابلِ قبول رویہ ہے۔ ٹی وی چینل پر پیش آنے والا واقعہ قابل افسوس ہے۔ انہوں نے کہا کہ میڈیا کو ایسے حساس معاملات پر زیادہ ذمہ داری کا مظاہرہ کرنا چاہیے۔
