لاہور 07 جنوری 2021 (ٹی این ایس): عالمی وبا کے پاکستان میں وار جاری ہیں۔ مسلم لیگ ن کی ایم پی اے منیرہ یامین ستی کورونا کے باعث انتقال کرگئیں، مرحومہ پنجاب اسمبلی کی رکن تھیں۔تفصیلات کے مطابق لیگی رہنما منیرہ یامین ستی کی گزشتہ دو ہفتوں سے طبعیت انتہائی خراب تھی، ان کا نجی ہسپتال میں علاج جاری تھا۔ ان کی تشویشناک حالت کے پیش نظر انھیں وینٹی لیٹر پر رکھا گیا تھا تاہم وہ جانبر نہ ہو سکیں اور عالمی وبا مبتلا ہو کر خالق حقیقی سے جا ملیں۔منیرہ یامین ستی کے انتقال پر اہم سیاسی اور سماجی شخصیات کی جانب سے افسوس اور تعزیت کا اظہار کیا جا رہا ہے۔ پنجاب کے وزیراعلی عثمان بزدار نے رکن اسمبلی کے انتقال پر دلی دکھ اور افسوس کا اظہار کرتے ہوئے ان کے اہلخانہ سے اظہار تعزیت کیا ہے۔سردار عثمان بزدار کی جانب سے جاری تعزیتی پیغام میں کہا گیا ہے کہ اللہ تعالی سے دعا ہے کہ وہ مرحومہ کے خاندان کو اس موقع پر صبر دے اور منیرہ یامین ستی کی روح کو اپنے جوار رحمت میں جگہ عطا فرمائے۔خیال رہے کہ مسلم لیگ (ن)کی رہنما منیرہ یامین ستی 2018کے الیکشن میں اسمبلی میں مختص خواتین کی نشست پر رکن منتخب ہوئی تھیں۔ ان کی جماعت کی جانب سے بھی انھیں اہم رہنما قرار دیتے ہوئے وفات پر گہرے دکھ اور افسوس کا اظہار کیا گیا ہے۔
