اسلام آباد 08 مارچ 2022 (ٹی این ایس): لاہور میں جہانگیر ترین گروپ کا اہم اجلاس عون چوہدری کی رہائشگاہ میں ہوا جس میں اہم معاملات پر مشاورت کی گئی۔
ترین گروپ کے ارکان نے جہانگیر ترین سے آئندہ کے لائحہ عمل کیلئے رہنمائی مانگ لی، جہانگیر ترین وڈیو لنک کے ذریعےاجلاس میں شریک ہوئے، جہانگیر ترین کو پنجاب اور وفاق کی سیاسی صورتحال پر بریفنگ دی گئی۔
اجلاس کے شرکاء کو رکن پنجاب اسمبلی اور گزشتہ روز ترین گروپ میں شامل ہونے والے عبدالعلیم خان کی اسلام آباد میں حکومتی شخصیات سےملاقاتوں سے بھی آگاہ کیا گیا۔
اجلاس میں مؤقف اپنایا گیا کہ وفاق میں تحریک عدم اعتماد آچکی ہے جلدگروپ کی حکمت عملی کوفائنل کرناہوگا۔
جہانگیر ترین گروپ کا عون چوہدری کی رہائش گاہ پر ہنگامی اجلاس جاری۔ وفاقی وزیر پرویز خٹک کے ترین گروپ سے رابطے کے بعد ہنگامی اجلاس طلب کیا گیا۔ اجلاس میں جہانگیر ترین کی ویڈیو لنک کے ذریعے شرکت۔ آئندہ کے لیے سیاسی لائحہ عمل طے کیا جائےگا۔ pic.twitter.com/Wankma2MG0
— Malik Ali Raza (@MalikAliiRaza) March 8, 2022
اس موقع پر جہانگیر ترین نے اپنے گروپ کے ارکان کے گفتگو کرتے ہوئے کہا کہ جلد دوبارہ مشاورت ہوگی۔
خیال رہے کہ گزشتہ روز علیم خان گروپ نے ترین گروپ میں شمولیت کا اعلان کیا تھا اور اس گروپ کا دعویٰ ہے کہ ان کے پاس پنجاب اسمبلی کے 65 ارکان کی حمایت حاصل ہے اور یہ گروپ پنجاب کی طرز حکمرانی کیخلاف ہیں۔