سابق وزیراعظم پاکستان محمد نوازشریف کا اسلام آباد سے لاہور آمد کا شیڈول اور روٹ تبدیل

 
0
1087

اسلام آباد/لاہور اگست 05۔(ٹی این ایس ) سابق وزیراعظم پاکستان نوازشریف کا اسلام آباد سے لاہور آمد کا شیڈول اور روٹ تبدیل کردیا گیا ،نواز شریف آج اتوار کی بجائے بدھ کے روز موٹر وے کی بجائے جی ٹی روڈ اسلام آباد سے لاہور پہنچیں گے ۔ بتایاگیاہے کہ اراکین اسمبلی ،رہنماؤں اور کارکنوں کی خواہش پرروٹ تبدیل کیا گیا ۔محمد نواز شریف کی زیرقیادت پنجاب ہاؤس میں پارٹی رہنماؤں کا اجلاس ہوا جس میں وزیر اعلی پنجاب شہباز شریف، وزیر خزانہ اسحاق ڈار، ڈاکٹر آصف کرمانی، احسن اقبال، مریم اورنگزیب،امیر مقام، طلال چوہدری، دانیال عزیز پرویز رشید اور مصدق ملک نے شرکت کی۔دوسری جانب مسلم لیگ (ن)کے ترجمان کا کہنا ہے کہ مشاورتی اجلاس میں کئے گئے فیصلے کی رو سے میاں نوازشریف کی اتوار کے روز براستہ موٹروے لاہور روانگی منسوخ کردی گئی ہے۔ نوازشریف اب 9 اگست کو بدھ کی صبح 9 بجے جی ٹی روڈ سے لاہور کے لیے روانہ ہوں گے جس کے لیے تمام تر انتظامات اور تیاریوں کو حتمی شکل دی جارہی ہے۔ ان کا کہنا تھا کہ سابق وزیر اعظم کی لاہور روانگی کے شیڈول میں تبدیلی کا فیصلہ مسلم لیگی تنظیموں ، عہدیداروں ، اراکین قومی و صوبائی اسمبلی اور لیگی کارکنوں کی خواہش اور مطالبے پر کیا گیا ہے تاکہ کارکنان اور عوام کی زیادہ سے زیادہ تعداد شرکت کرسکے۔