سیکیورٹی فورسز نے کامیاب آپریشن کے دوران شمالی وزیرستان سے گزشتہ روز جمعہ 20 جنوری کو اغوا کیے گئے تیل کمپنی کے چاروں ملازمین کو بازیاب کرالیا۔
سیکورٹی ذرائع کے مطابق فورسز کی جانب سے خفیہ اطلاع پر میرانشاہ کے علاقے ہمزونی میں خٹی کلی کے قریب آپریشن کرکے مغویوں کو بازیاب کرایا گیا۔
آپریشن کے دوران سپاہی زفران اور 2 تیل کمپنی کے ملازمین اغوا کاروں کی فائرنگ سے زخمی بھی ہوئے۔ جس کے بعد زخمیوں کو فوری طبی امداد کیلئے ایف ٹی سی اسپتال میرانشاہ منتقل کردیا گیا۔
سیکیورٹی ذرائع کے مطابق اغوا کاروں سے فائرنگ کے تبادلے میں 2 ملزم ہلاک بھی ہوئے۔ ہلاک شدگان اغوا کاروں کی لاشیں سیکورٹی فورسز نے قبضے میں لے لیں۔
آپریشن کے دوران سپاہی زفران اور 2 تیل کمپنی کے ملازمین ساغیر اور مقسود علی زخمی ہوئے ، زخمیوں کو ایف ٹی سی ہسپتال میرانشاہ منتقل کردیا گیا ۔
اغوا کاروں کی شناخت سے متعلق کوئی تفصیلات فی الحال میڈیا کے ساتھ شیئر نہیں کی گئی ہیں۔
واضح رہے کہ چاروں ملازمین کو جمعہ 20 جنوری کو اغوا کیا گیا تھا۔ چاروں ملازمین شمالی وزیرستان کے علاقے انغرکلی کے قریب سروے کیلئے گئے تھے، تاہم کام سے واپسی پر ملازمین کو نامعلوم مسلح افراد اغوا کرکے لے گئے تھے۔
