وزیراعظم محمد شہباز شریف پارینے کہ سیاسی سوگوی آن بیدس زرگزرانی سوگوی ممکن اف، 9 مئی نا واقعہ غاک قوم ءِ ڈکھیائی کریر و کاٹم ءِ شرم آن شیف کریر، ہراقوم شہید و غازی تے گیرام کے او زندہ سلپک، رجیم چینج نا دروغ انا دعویٰ کروک آتا دروغ انا پروپیگنڈا بے نقاب مسنے، روس آن 45 ہزار ٹن اڑزان خام تیل رسینگا، آئی ایم ایف نا غٹ شڑت آتے پورو کرینن، معاہدہ زوت مریک، اسلام آباد اٹی سالڈ ویسٹ نا نظام درستی راستی کرفنگک۔ داخیال آتا درشانی ءِ او چارشنبے نادےآ کیپٹن کرنل شیرخان شہید(مسکوہی آئی جے پی) روڈ انا اول سرآن تفنگ نا ڈٹ انا بنائی دود آن تران کرسا کرے۔ داوخت آ بنائی دوداٹی بنجائی وزیر داخلہ رانا ثناء اللہ ، بنجائی وزیرحوالکاری و شینکاری مریم اورنگزیب ، وزیراعظم نا خصوصی کمکار احدچیمہ، قومی اسمبلی نا باسک طاہرہ اورنگزیب، مسکوہی قومی اسمبلی نا باسک حنیف عباسی، ڈاکٹر طارق فضل چوہدری، ملک ابرار، انجم عقیل خان، ملک شکیل اعوان و مسلم لیگ (ن) نا راہشون تیان بیدس چیئرمین سی ڈی اے نور الامین مینگل و کمشنر راولپنڈی لیاقت چٹھہ و ایلو تعلقدار محکمہ غاتا آفیسر و کارندہ غاک ساڑی ئسر۔ دودا ٹی وزیراعظم آئی جی پی روڈ ءِ کیپٹن کرنل شیرخان نا پن اٹ کننگ نا پڑو کرے۔ داوخت آ تران کرسا وزیراعظم پارے کہ تدوک آ حکومت نا دور اٹی ہیبدار ڈٹ بندی نا سوب آن دا ڈٹ تعطل نا گواچی ئس۔ ڈٹ انا پوروی آ وزیرداخلہ، چیئرمین سی ڈی اے و ایلو کمامدارآتے مبارکبادی ایتیوہ، ڈٹ آ ہرازیبائی اٹ لینڈ سکیپنگ و اباغبانی کننگانے او ستاکڑزک۔ اوپارےکہ شہید و غازی تے یات تخوک آ قومک سرسہب مریرہ ہراقومک شہید وغازی تے گیرام کیر او زندہ سلپسہ۔ شہید آک جون تے دلدست آ تخسا ملک انا اسہ اسہ انچ ءِ دشمن تیان بچفینو، شہید و تینا چناتے چوری کریر ولے لکھ آ چناتے چوری مننگ آن بچفیر، وطن تون مہرومریبت کروک آ شاری 9 مئی کون آ واقعہ غاتا سجفنگ ہم کپک، شہید کیپٹن کرنل شیرخان نا پن اٹ ڈٹ ءِ کننگ نا مسخت قوم ءِ شہید آتا عظیم قربانی تیان معلومدار کننگ ءِ۔ اوپرے کہ تدوک آ حکومت میٹرو اسلام آبا د ڈٹ ءِ بندکریسس، نن بننگ تون بحال کرین۔ رجیم چینج انا دروغ انا دعویدار آتا پروپیگنڈا اینو بے نقاب مسنے۔ عمران نیازی مک انا وقار ءِ مش تا کننگ نا کوشست کرے۔ عمران نیازی پروپیگنڈا کرے کہ روس اتون تعلقداری تا سوب آن کنا حکومت ءِ بِٹنگا۔ وزیراعظم پارے کہ نن روس آن اسہ لکھ ٹن خام تیل انا معاہدہ مسنے۔ 45 ہزار ٹن خام تیل اتسا اولیکو جہاز سرمسنے۔ روس آن بروک ا ٓتیل جہانی مارکیٹ آن 15 ڈالر فی بیرل اڑزان ءِ۔ اوپارے کہ حکومت بجٹ اٹ الس ءِ ریلیف تسنے ، شاندار ءُ بجٹ اس پیش کننگ آ وزیرخزانہ اسحاق ڈار و اونا مچ آ ٹیم ءِ مبارکبادی ایتیوہ، مشکل آتیان پد ہم کم از کم اجرت، تنخواہ و پنشن اٹی خاطرخواہ ودکی کرین۔ اوپارے کہ سیاسی سوگوی آن بیدس اسہ ملک اسے ٹی ہم زرگزرانی سوگوی ممکن اف۔ مسکوہی حکومت آئی ایم ایف تون معاہدہ نا پاسداری ءِ کپرسا ملک ءِ نسخان تس۔ ساڑی حکومت آئی ایم ایف نا غٹ شڑت آتے پورو کرینے، معاہدہ زوت مریک۔ عمران نیازی کرپشن نا دوبہ خلک ولے شاہدی تتو۔ عمران نیازی سمجھک کہ اوڑا کرپشن نا دروغ انا دوبہ ءُ تو عدالت آکائے، تینا بے گناہی ءِ پک کے۔ اوپارے کہ اسلام آبادسالڈ ویسٹ نا نظام مفننگ نا بریبر ئس، زوت اسلام آباد اٹی سالڈ ویسٹ نا نظام درستی راستی کرفنگک، داڑکن اینو ہی ورک آرڈر جاری کننگک۔ اوپارے کہ ورناتیکن اسہ لکھ لیپ ٹاپ اسکیم نا بناجولائی آن مریک، مچ آ ملک انا ہشار چناک دااسکیم آن فائدہ ہرفرہ۔ ورناتے کسبکار جوڑ کننگ، کاروبار کن سازگار چاگڑد، وام تا فراوانی و کشت وکشار نا شونداری ننا اولیت ءِ۔ تدوک آ حکومت ورناتے ریفنگ و متنفر کننگ نا کوشست کرے، نن تینا گام گیج آتیان ملک ءِ قائدنا پاکستان و علامہ اقبال نا تغ تے پورو کینہ۔
