وزیراعظم محمد شہباز شریف یونان کشتی شکست نا جاست وپاستی کمیٹی ءِ کارروائی پورو کرسا واقعہ نا زوت رپورٹ ءِ پیش کننگ نا پارت کرسا پارینے کہ واقعہ نا زموار اتے زوت اوفتے اوفتا کروک نا سزا تننگے۔ وزیراعظم آفس نا میڈیا ونگ آن جاری پریس ریلیز نا رداٹ چارشنبے نادے آ وزیراعظم محمد شہبازشریف نا کماشی ٹی یونان نا خڑک کشتی اسے نا چپی مننگ نا واقعہ غا بڑزکو کہول انا دیوان اس اڈہلک۔ دیوان اٹی بنجائی وزیر راناثناء اللہ، مریم اورنگزیب، خصوصی کمکار طارق فاطمی، ڈی جی ایف آئی اے، چیف سیکرٹری آزاد کشمیر و تعلقدار بڑزکو کمامدارآک بشخ ہلکر۔ وزیراعظم ءِ یونان نا خڑک بحیرہ روم اٹ کشتی اسے نا چپی مننگ نا واقعہ گا سرجم حوال تننگا ۔ وزیراعظم محمد شہباز شریف اَرفے کہ انسانی اسمگلر آتا کارروائی تے وخت آ انت اکن توننگتو؟وزیراعظم ترندی نا درشانی ءِ کرسا اَرفے کہ زہمی مخلوق نا ہرا ضلع غاتیان تعلق ءِ، ہموجاگہ نا انتظامیہ اوار اسمگلر و ایجنٹ آتا کارروائی تا وخت آ نوٹس ءِ انت اکن ہلتو؟۔ وزیراعظم وزیرداخلہ رانا ثناء اللہ ءِ جاست وپاست نا پورو چاروکی ءِ کننگ و زموار آتے سزا ترفنگ نا بابت المی کانود سازی کن سلاہ مرتب کننگ نا پارت کرے۔ دیوان اٹی وزیر اعظم ءِ کشتی چپی مننگ نا واقعہ غا سرجم حوال تننگا۔ دیوان ءِ پاننگاکہ یونانی کوسٹ گارڈ 12 جون آ کشتی نا پیدواری ءِ کرے ہراٹی اسہ کساس اسے نا رداٹ 700 نا خڑک مخلوق سوار ئسر۔ کشتی مصری بندغ اسےنا ملکیت ئس ہراٹی زیات تر سُواری تا تعلق شام ، لیبیا وپاکستان آن ئسک۔ کشتی ٹی سوار مخلوق آن 102 مخلوق ءِ زندہ ریسکیو کننگانے ہرافتیان 15 نا تعلق پاکستان آن ءِ۔ وزیراعظم پارے کہ کشتی نا چپی مننگ آن داوخت اسکان جم وڑاٹ 15 مخلوق ءِ دزگیر کننگانے، ہراٹی داواقعہ نا مرکزی دوبہ دار ہم اوار ءِ۔ دیوان ءِ مستی پاننگاکہ انسانی اسمگلنگ اٹ چندی ملک آتیٹی ساڑی اسہ منظم نیٹ ورک اس اوار ءِ۔ وزیراعظم دا باندات نا سرجم جاست وپاست ءِ زوت پورو کننگ و ایف آئی اے ءِ اونا توننگ نا گچین گا م گیج کننگ نا پارت کرے۔ وزیراعظم کمشنر گوجرانوالہ ءِ ہم ضلع ٹی داوڑنا ایجنٹ آتا پیدواری ءِ کرسا اوفتے زوت کانود نا گرفت اٹ اتنگ نا پارت کرے۔
