وزیراعظم محمد شہباز شریف پارینے کہ چین پاکستان اقتصادی راہداری (سی پیک) نا ڈٹ مسکوہی وزیراعظم نواز شریف نا کماشی ٹی شون ہلک، کم آن کم وخت اٹی شونداری ڈٹ آتے پورو کننگ نا ریکارڈ اس جوڑ مس، چینی حکومت و کمپنی تا کنڈآن 25.4 ارب ڈالر نا زرکاری بس، سی پیک نا بروک آ ریسہ غاتیکن ننے پوسکن آ عزم اتون مون آ ہنوئی ءِ و اسپیشل اکنامک زون تا جوڑ کننگ و کشت وکشار ، انفارمیشن ٹیکنالوجی و معدنی وسیلہ غاتا شونداری ڈٹ آتیا کاریم کننگ ءِ، آئی ایم ایف تون 12 جولائی آ معاہدہ مریک، پاکستان نا ڈیفالٹ نا مرمراسکان ہچ ءُ گڑتی ا س اف، مشکل وخت اٹی چینی حکومت و سنگت ملک آتا منت واراُن و اوفتا کمک ءِ مدا م یات تخنہ۔ داخیال آتا درشانی ءِ او سی پیک نا مفاہمتی یات داشت آ دستخط آتا اسہ دہائی اس پورو مننگ نا وخت آ اڈ ہلوک دودآن تران کرسا کرے۔ داوخت آ بنجائی وزیر اسحاق ڈار، احسن اقبال، مریم اورنگزیب، مولانا اسعد محمود، خرم دستگیر آن بیدس چینی ناظم الامور پانگ چنشوئی و چین و پاکستان نا سینئر کمامدارآک ہم ساڑی ئسر۔ وزیراعظم شہباز شریف پارے کہ دہ سال مست 2013ٹی مسلم لیگ (ن) الیکشن ءِ کٹسا اقتدار اٹی بس تو او چینی سرکڑدہ غاتون اواری اٹ دا ڈٹ انا بناءِ کرے، 5 جولائی 2013 آ بیجنگ اٹی سی پیک نا بابت ایم او یو آ دستخط مس و دااولیکو ایم او یو ءِ ہراحقیقت اٹ بدل مس۔ وزیراعظم پارے کہ سی پیک نا رداٹ پاکستان اٹ کم انگا وخت اٹی کول و ہائیڈ ل ناپاور پروجیکٹ ، اورنج لائن ٹرین و روڈ انفراسٹرکچر نا ڈٹ آتے پورو کننگ نا ریکارڈ جوڑ مس، پاکستانی و چینی سرکڑدہ و انجینئر و خواری کش آک دے و نن خواری کریر۔ اومسکوہی وزیراعظم نواز شریف و اونا کابینہ و ٹیم انا باسک آتے سی پیک نا ڈٹ ءِ مون آ دننگ آ خراج تحسین پیش کرے۔ وزیراعظم چینی سرکڑدہ و حکومت نا منت واری ءِ ہرفے ہرامشکل آ وخت اٹی پاکستان تون تفیر۔ وزیراعظم پارے کہ آئی ایم ایف معاہدہ کن چین ننکن انتس کرے ، نن اودے مدام یات تخنہ۔ وزیراعظم پارے کہ چینی سرکڑدہ نا منت واری ءِ ہرفنگ کن اوڑتون لوز اف۔ وزیراعظم سی پیک ءِ بھاز شفاف ءُ ڈٹ اس گوندسا پارے کہ بدبختی و است ہسونی نا مقام ءِ کہ مسکوہی حکومت دا ڈٹ اٹی نئے بیرہ درغ کشا بلکن سٹی ءُ دوبہ خلک و بدگمانی تالان کرے ہراڑان سی پیک نا ڈٹ آ کاریم سست مس و پاکستان و چین نا تعلقداری ہرا ہمالیہ غان ہم بڑز ءُ و اوفتے اسہ دشمن اس ہم نزور کننگ نا سجفنگ کتو، دوست نما دشمنک اوٹی دراڑ شاغنگ و دا تعلقداری تے خراب کننگ نا کوشست کریر ولے مخلوق حکومت اقتدار ءِ سنبھالنگ تون پاک چین تعلقداری تے دُوارہ گچین آن گچین تر جوڑ کننگ کن مخلصانہ کوشست کرے ہرانا رداٹ بی ٹو بی اسپیشل اکنامک زون جوڑ مریک ہرانا کمک اٹ صنعت کاری، پیدوار و برآمدات مریک۔ وزیراعظم پارے کہ پاکستان و چین نا شریداری اٹ کشت وکشار نابشخ اٹی شونداری نا بے تحاشا وارخواہی ساڑی ءِ۔ اوپارے کہ ننا مخلوق حکومت دھرنہ، برانز، مچی ، دھڑکو و نامساعد حالیت آتیان پد ہم ملک اٹی شونداری کن کاریم کرے۔ انشاء اللہ 12 جولائی آ آئی ایم ایف تون معاہدہ مننگ والا ءِ۔ وزیراعظم پارے کہ ننےاواری اٹ پاکستان نا زرگزرانی حالیت آتے سنبھالوئی ءِ، چین مشکل آ وخت اٹی ننتون تفے و پنچ ارب ڈالر تس، سعودی عرب، یواے ای و اسلامی شونداری بینک ہم پاکستان نا پبی کمک ءِ کرے، چین ، پاکستان نا سنگت ملک و آئی ایم ایف نا منیجنگ ڈائریکٹر نا منت واراُٹ ہرافک مشکل وخت اٹی ننا کمک ءِ کریر۔
