وزیراعظم محمد شہباز شریف جہانی مالیاتی فنڈ(آئی ایم ایف) نا منیجنگ ڈائریکٹر کرسٹالینا جارجیوا تون اوڑدہی کرے۔ پنچ شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم ، ہرا پیرس اٹی ’’نیوگلوبل فائنانسنگ پیکٹ‘‘ نا سروک دیوان اٹی بشخ ہلنگ کن فرانس نا دورہ غاٹی ءِ، آئی ایم ایف نا منیجنگ ڈائریکٹر تون اوڑدہی ٹی پاکستان و آئی ایم ایف نا نیام اٹ برجاپروگرام و کمکاری آ گپ وتران کرے۔ وزیراعظم 27 مئی 2023آ ٹیل فون آ مروک آ گپ وتران نا حوالہ ءِ ترسا آئی ایم ایف نا منیجنگ ڈائریکٹر ءِ پاکستان نا زرگزرانی حالیت آتا بارواٹی معلومدار کرے۔ وزیراعظم زرگزرانی شونداری و سوگوی کن حکومتی گام گیج آتا خاکہ اس پیش کرے۔ اوپارے کہ ایکسٹینڈڈ فنڈ فیسیلٹی (ای ایف ایف) نا رداٹ نہہ می جاچ اکن غٹ پیشگی گام گیج آتے پورو کننگانے و حکومت پاکستان آئی ایم ایف تون طے مروک آ تینا زمواری تے ادا کننگ نا عزم کرینے۔ وزیراعظم دا اومیت نا درشانی ءِ کرے کہ آئی ایم ایف نا ای ایف ایف نا رداٹ جتا فنڈ آتے زوت آن زوت جاری کننگک داڑان پاکستان اٹ زرگزرانی سوگوی و الس ءِ ریلیف تننگ کن حکومت نا برجاکوشست آتے سوگوی ملک۔ آئی ایم ایف نا منیجنگ ڈائریکٹر وزیراعظم ءِ جاچ ہلنگ نا برجا عمل نا بابت تینا ادارہ نا نکتہ نظر آن معلومدار کرے۔ وزیراعظم آفس نا کنڈآن جاری بیان نا رداٹ اوڑدہی آن پاکستان و آئی ایم ایف نا نیام اٹ پیش رفت نا بابت فائدہ ئی ءُ موقع اس دُوبس۔ اوڑدہی ٹی بنجائی وزیر چاگڑدی بدلی شیری رحمان، بنجائی وزیر اقتصادی امور سردار ایاز صادق، بنجائی وزیر حوالکاری و شینکاری مریم اورنگزیب ، وزیر مملکت خزانہ ڈاکٹر عائشہ غوث پاشا، وزیراعظم نا خصوصی کمکار طارق فاطمی و فرانس اٹی پاکستان نا سفیر عاصم افتخاراحمد ئسک ہم ساڑی ئسر۔
