چیئرمین سی ڈی اے محمد علی رندھاوا کا پی ٹی سے ایل چوک جناح ایونیو کا دورہ
اسلام آباد: (پ ر: مورخہ 23 مئی، 2024): چیئرمین کیپیٹل ڈیویلپمنٹ اتھارٹی (سی ڈی اے) چوہدری محمد علی رندھاوا نے جمعرات کی علی الصبح پی ٹی سے ایل چوک، جناح ایونیو کا دورہ کیا. اس موقع پر سی ڈی اے کے دیگر افسران بھی انکے ہمراہ تھے.
چیئرمین سی ڈی اے محمد علی رندھاوا نے ہدایت جاری کرتے ہوئے کہا کہ پی ٹی سی ایل چوک پر ٹریفک جام کے خاتمے کے لئے منصوبہ بندی کی جائے. انہوں نے مزید کہا کہ اس چوک پر ٹریفک جام کے خاتمے کے لئے قلیل المدتی اور مستقل حل کے لئے پلان فوری طور پر پیش کئے جائیں. اسی طرح مستقل حل کے لئے منصوبہ تیار کرکے جلد از جلد متعلقہ فورم کے سامنے منظوری کے لئے پیش کیا جائے.
چیئرمین سی ڈی اے نے مزید کہا کہ منصوبے کی منظوری کے فوری بعد اس پر باقاعدہ کام کا آغاز کیا جائے. اور شہر میں جاری منصوبوں پر کام مکمل کرنے کے ساتھ ساتھ مفاد عامہ کے نئے منصوبے بھی شروع کئے جائیں گے.
چوہدری محمد علی رندھاوا نے مزید کہا کہ پی ٹی سی ایل چوک پر ٹریفک جام کے باعث شہریوں کو اذیت کا سامنا کرنا پڑتا ہے لہٰذا اس منصوبے پر کام ترجیحی بنیادوں پر شروع کیا جائے.
