اسلام آباد(ٹی این ایس) جماعت اسلامی کا یکم ستمبر سے ’حق دو عوام کو‘ تحریک چلانے کا اعلان

 
0
42

امیر جماعت اسلامی حافظ نعیم الرحمان نے کہا ہے کہ نواز شریف کو چاہیے کہ وہ پنجاب کی سیاست کے بجائے بھائی کے ساتھ مل کر ملکی سطح پر بجلی کے نرخ کم کرنے میں کردار ادا کریں، ہم یکم سمتبر سے ’حق دو عوام کو‘ تحریک شروع کریں گے ۔

تفصیلات کے مطابق کوئٹہ پریس کلب میں صحافیوں سے بات چیت کرتے ہوئے امیر جماعت اسلامی حافظ نعیم نے کہا کہ آئی پی پیز کے ساتھ معاہدوں میں حکومتی لوگ بھی شامل ہیں،حکومت آئی پی پیز کو لگام دے، عوام کو ریلیف دیا جائے، آئی پی پیز چارجز کی مد میں بجلی نہ بنانے کے پیسے بھی لیے گئے۔

حافظ نعیم الرحمان نے کہا کہ پورے ملک میں بدامنی پھیلی ہوئی ہے، لاپتا افراد کے حوالے سے بلوچستان میں لوگ احتجاج کررہے ہیں، احتجاج کرنا ہر ایک کا آئینی حق ہے، لاپتا افراد کا مسئلہ بلوچستان کا سب سے بڑا مسئلہ ہے، لاپتا افراد کو آئین کے مطابق عدالتوں میں لایا جائے۔

انہوں نے کہا کہ بلوچستان سے سوئی گیس نکلتی ہے پہلا حق یہاں کے عوام کا ہے، بلوچستان کے عوام کو ریلیف دیا جائے، بہاولپور کی طرح یہاں بھی سولر پارک بنایا جائے، سیندک سے نکلنے والے خام مٹیریل کے لیے فیکٹری لگائی جائے، بلوچستان میں بارڈر ٹریڈ کو فروغ دیا جائے، ایران سے سستی گیس کی فراہمی کے لیے بھی اقدامات کئے جائیں۔

ان کا کہنا تھا کہ بجلی کے بلوں کی ادائیگی اب وزیراعظم کے بس کی بات نہیں رہی ہے، بجلی کے بل ادا کرنا عوام کے لیے ممکن نہیں رہا، نواز شریف نے 30 سال پنجاب کی سیاست کی، صرف پنجاب کے لیے بجلی کے نرخ کم کیے، نواز شریف کو چاہیے کہ وہ ملکی سطح پر بجلی کے نرخ کم کرنے کے لیے بھائی کے ساتھ مل کر کام کریں۔

امیر جماعت اسلامی نے اس موقع پر حق دوعوام کو، حق دو بلوچستان تحریک کے نام سے تحریک شروع کرنے کا بھی اعلان کیا ہے، کہا ہے کہ وہ اپنی تحریک خود چلائیں گے۔

انہوں نے کہا کہ ہم اپنی تحریک کے لیے کسی کا کندھا نہیں بنیں گے۔ انہوں نے سوال اٹھایا کہ لوگ بتائیں کہ تحفظ آئین پاکستان تحریک کہاں ہے؟