اسلام آباد (ٹی این ایس) محنت کش برادری اور علاقے کی بجائے کارکردگی کی بنیاد پر قیادت کا انتخاب کریں۔ چوہدری محمد یٰسین
ملازمین پلاٹوں کی الاٹمنٹ میں رکاوٹ ڈالنے والے عناصرکو ہمیشہ کے لیے ادارے سے اٹھا کر باہر پھینک دیں گے۔ اورنگزیب خان
سی ڈی اے ریونیو ڈائریکٹوریٹ کے زیر اہتمام جلسے میں ہزاروں محنت کشوں کی شرکت۔
سی ڈی اے ریونیو ڈائریکٹوریٹ کے زیر اہتمام ریفرنڈم کے حوالے سے انتخابی جلسہ اقبال ہال میں منعقدہواجس میں سی ڈی اے مزدور یونین کے جنرل سیکرٹری چوہدری محمد یٰسین،صدراورنگزیب خان،سپریم ہیڈ مرزاسعید اختر،حاجی راجہ صابر،اظہار عباسی،ملک عاصم،راجہ رئیس،حاجی مشتاق احمد شاہد،اظہر خان تنولی،محمد اشرف مغل،خالد محمود،عابد علوی،ملک رشید،زاہد کاٹھیا،راجہ رحیم نواز،عدنان خالد،نوید عباسی،امان اللہ بلوچ،آفتاب کیانی،کامران غوری،عمران عباس،طاہرمحمود،ظہیرعباس،رضوان الرشید،رمیض گل سمیت سی ڈی اے مزدور یونین کے عہدیداران،باڈی ممبران اور ہزاروں محنت کشوں نے شرکت کی،جلسے سے خطاب کرتے ہوئے سی ڈی اے مزدور یونین کے جنرل سیکرٹری چوہدری محمد یٰسین،اورنگزیب خان و دیگرنے کہا کہ 06فروری کو سی ڈی اے کے محنت کش نے اپنے بچوں کا مستقبل محفوظ بنانے کے لیے چور اورچوکیدار کے فرق کو مدنظر رکھنا ہے،آپ کو ایسی قیادت کا انتخاب کرنا ہے جو حاکم کی جگہ چوکیداربن کر آپکے حقوق کا تحفظ کرے،باشعور،امین اور جرات مند ہونے کے ساتھ اسکی ماضی کی کارکردگی کو بھی مدنظر رکھنا ہو گا،ہم سی ڈی اے کے محنت کش سے کہنا چاہتے ہیں کہ 2006سے پہلے اور آج ملنے والی مراعات اور اپنی پے سلپ کو سامنے رکھتے ہوئے آپ بہتر فیصلہ کر سکتے ہیں کہ کس تنظیم نے آپ لوگوں کو تاریخی مراعات سے نوازا،پلاٹوں کی الاٹمنٹ،بیوہ فنڈ کاقیام،خوشبوالاؤنس،ڈیلی ویجز،کنٹریکٹ،مسٹررول اور اوورایج ملازمین کی مستقلی،سکیلوں کی اپ گریڈیشن،عیدالاؤنس سمیت سینکڑوں کارنامے مزدور یونین کی تاریخ کا حصہ ہیں،سی ڈی اے کے پندرہ ہزار محنت کش اس شہر کی سب سے بڑی طاقت ہیں اور ان محنت کشوں نے چار مرتبہ مزدور یونین پر اپنے اعتماد کااظہار کیا،سی ڈی اے مزدور یونین نے اپنے دور میں ریونیو ڈائریکٹوریٹ کے ملازمین کے لیے بل ڈسٹری بیوشن کاریٹ 14روپے سے بڑھا کر 30روپے کروایا اور ریونیوڈائریکٹوریٹ کی سہولت مرکز سے اقبال ہال منتقلی سمیت کروڑوں روپے بطوراعزازیہ دلوایا،سی ڈی اے مزدور یونین نے 30اپریل 2011کو ریگولرو ریٹائرڈ ملازمین،بیواؤں کے لیے چھ ہزار سے زائد پلاٹوں کی منظوری کرواکر قرعہ اندازی کا حکم نامہ جاری کروایا تھا جس کی قرعہ اندازی کے خلاف مزدوردشمن ٹولہ اپنے حواریوں کے ذریعے عدالتوں سے سٹے لیتا رہا،پلاٹ سی ڈی اے کے محنت کش کا حق ہے جو انھیں ہر صورت میں ملے گا اور کوئی مائی کا لال سی ڈی اے مزدور یونین کے ہوتے ہوئے ہمارے محنت کش کے پلاٹوں کو اب نہیں روک پائے گا،06فروری کو سی ڈی اے کے محنت کش نے حق و سچ کا فیصلہ کر کے اپنی منزل کا تعین کرنا ہے اور پلاٹوں کی الاٹمنٹ،ملازمین کے بچوں کی بھرتی اور پروموشن میں رکاوٹ ڈالنے والے عناصرکو ہمیشہ کے لیے ادارے سے اٹھا کر باہر پھینکنا ہے،انشاء اللہ فتح سی ڈی اے مزدور یونین کا مقدر بن چکی ہے،مزدور یونین محنت کشوں کے تمام مسائل کو ترجیح بنیادوں پر حل کرنے کی صلاحیت رکھتی ہے سی ڈی اے کا محنت کش مزدور یونین کے پرچم تلے متحد ہوکر اسے بھاری اکثریت سے کامیاب کروائے گا
