اسلام آباد (ٹی این ایس) پاکستان میں پلاسٹک شاپنگ بیگز تیزی سے انسانی صحت، زمینی زرخیزی، آبی حیات، اور فضائی ماحول کے لیے ایک زہرِ قاتل بن چکے ہیں۔ ماحولیاتی ماہرین اور انسانی حقوق کی تنظیمیں مسلسل متنبہ کر رہی ہیں کہ ان بیگز میں شامل خطرناک کیمیکلز سے نہ صرف کینسر، بانجھ پن، سانس کی بیماریاں، اور ہارمونی نظام کی خرابی جنم لیتی ہے، بلکہ یہ ہماری فضا، زمین، اور پانی کو بھی مستقل نقصان پہنچا رہے ہیں،سندھ حکومت کی جانب سے پلاسٹک شاپنگ بیگز پر مکمل پابندی کے حالیہ فیصلے کو خوش آئند قرار دیتے ہوئے، چیئرمین پیاس انٹرنیشنل رانا عمران لطیف نے وفاقی حکومت سے مطالبہ کیا ہے کہ یہ قدم صرف صوبائی نہیں بلکہ قومی سطح پر فوری طور پر اٹھایا جائے۔ ان کا کہنا ہے کہ شاپنگ بیگز ایک خاموش قاتل ہیں جو ہماری آئندہ نسلوں کی صحت اور ہمارے ماحول کو مستقل طور پر تباہ کر رہے ہیں اب وقت آ گیا ہے کہ حکومت قومی سطح پر ان کے خلاف سخت قانون سازی کرے اور اس پر مؤثر عملدرآمد یقینی بنائے۔”
پیاس انٹرنیشنل نے خبردار کیا ہے کہ اگر فوری اقدامات نہ کیے گئے تو آنے والے برسوں میں پلاسٹک آلودگی پاکستان کے بڑے شہروں کو ماحولیاتی بحران کی جانب دھکیل دے گی
