راولپنڈی /مالاکنڈ (ٹی این ایس) بلوچستان کے ضلع قلات میں سیکیورٹی فورسز نے کامیاب آپریشن کرتے ہوئے فتنتہ الہندوستان کے 4 دہشتگرد جہنم واصل کر دیے۔آئی ایس پی آر کے مطابق 19 اور 20 جولائی 2025 کی درمیانی شب سیکیورٹی فورسز کی جانب سے قلات کے علاقے پہرود میں خفیہ معلومات کی بنیاد پر ایک آپریشن کیا گیا۔آپریشن بھارتی خفیہ ایجنسی کی پشت پناہی سے چلنے والی دہشتگرد تنظیم فتنہ الہندوستان کے دہشتگردوں کی موجودگی کی اطلاع پر کیا گیا۔
آئی ایس پی آر کا کہنا ہے کہ کارروائی کے دوران، پاکستانی فورسز نے دہشتگردوں کے ٹھکانے کو موثر انداز میں نشانہ بنایا۔آپریشن کے دوران دہشتگردوں کے قبضے سے بھاری مقدار میں اسلحہ، گولہ بارود اور دھماکا خیز مواد بھی برآمد ہوا۔ہلاک شدہ دہشتگرد علاقے میں متعدد تخریبی کارروائیوں میں ملوث تھے۔ علاقے میں کلیئرنس اور سینیٹائزیشن آپریشن جاری ہے تاکہ ممکنہ مزید دہشتگردوں کا صفایا کیا جا سکے۔پاکستان کی سیکیورٹی فورسز بھارتی سرپرستی میں ہونے والی دہشتگردی کا قلع قمع کرنے کے لیے پرعزم ہیں اور دہشتگردوں کو انصاف کے کٹہرے میں لانے کے قومی عزم کا اعادہ کرتے ہیں۔
دوسری طرف مالاکنڈ درگئی کے علاقے مہردے میں سیکیورٹی فورسز کا فتنہ الخوارج کیخلاف تین روز سے جاری آپریشن مکمل ہوگیا۔ ڈپٹی کمشنر حامدالرحمن کے مطابق آپریشن کے دوران 9 خارجی مارے گئے اور 9 کو گرفتار کرلیا گیا، دہشت گرد گروہ میں غیرملکی بھی شامل ہیں۔مالاکنڈ میں درگئی کے علاقے مہردے میں سیکیورٹی فورسز نے فتنہ الخوارج کیخلاف آپریشن کیا، جس میں 9 خارجی مارے گئے، 9 کو گرفتار کرلیا گیا۔ڈپٹی کمشنر حامد الرحمان کے مطابق تین روز تک جاری رہنے والے آپریشن میں گن شپ ہیلی کاپٹروں نے بھی حصہ لیا، آپریشن کے دوران دہشتگردوں کے قبضے سے بھاری مقدار میں گولہ بارود برآمد ہوا، آپریشن مکمل کرکے علاقے کو کلیئر کردیا گیا۔ڈپٹی کمشنر نے بتایا کہ ضلع بھر میں سیکیورٹی بدستور سخت رہے گی، آپریشن میں پاک فوج، سی ٹی ڈی، ایف سی، الیٹ فورس اور لیویز نے حصہ لیا۔انہوں نے کہا کہ آپریشن کے دوران ہلاک و گرفتار فتنہ الخوارج کے دہشت گرد گروہ میں غیر ملکی بھی شامل ہیں۔
