راولپنڈی (ٹی این ایس) بحریہ ٹاؤن میں گردے فروشی کا نیٹ ورک بے نقاب، پولیس کا چھاپہ، ایک گرفتار، چھ فرار
بازیاب شخص کو بے ہوش کر کے گردہ نکالنے کی تیاری جاری تھی، خطرناک آلات برآمد
تھانہ روات پولیس نے بحریہ ٹاؤن فیز 8 کے ابوبکر بلاک میں بڑی کارروائی کرتے ہوئے گردوں کی غیر قانونی پیوندکاری میں ملوث گروہ کے خلاف کامیاب چھاپہ مارا، جس میں گروہ کا ایک کارندہ گرفتار کر لیا گیا، جبکہ گروہ کے چھ ارکان فرار ہو گئے۔
پولیس کے مطابق کارروائی ایک خفیہ اطلاع پر کی گئی، جس میں بتایا گیا کہ ایک گھر میں انسانی چیخ و پکار سنائی دے رہی ہے۔ پولیس نے فوری ردعمل دیتے ہوئے مذکورہ مقام پر چھاپہ مارا، جہاں سے ایک نوجوان حنان زاہد کو بازیاب کروایا گیا، جو ایک اسٹریچر پر بندھا ہوا تھا۔
پولیس کا کہنا ہے کہ متاثرہ نوجوان کو پہلے نوکری کا جھانسہ دے کر بلایا گیا، پھر نشہ آور مشروب پلا کر بے ہوش کیا گیا۔ بعد ازاں اس کے مختلف ٹیسٹ، کراس میچ اور دیگر طبی معائنے کیے گئے، تاکہ اس کا گردہ نکال کر فروخت کیا جا سکے۔
موقع سے گردے نکالنے کے لیے استعمال ہونے والے آلات بھی برآمد کیے گئے ہیں، جنہیں فوری طور پر تحویل میں لے لیا گیا ہے۔ پولیس کے مطابق، ابتدائی تفتیش میں گرفتار ملزم ظفر اللہ خان نے انکشاف کیا ہے کہ گروہ ملکی اور غیر ملکی شہریوں کو گردے فروخت کرتا تھا۔
چھاپے کے دوران فرار ہونے والے ملزمان میں معروف سرجن ڈاکٹر منظور، عمران، گل نواز، زیب، رفیق عرف فیکا شامل ہیں۔ پولیس نے واقعے کا مقدمہ 298-A، 295-A دفعات کے تحت تھانہ روات میں درج کر لیا ہے۔
مزید تفتیش جاری ہے اور فرار ملزمان کی گرفتاری کے لیے چھاپے مارے جا رہے ہیں
