اسلام آباد (ٹی این ایس): چیئرمین کیپیٹل ڈویلپمنٹ اتھارٹی (سی ڈی اے) محمد علی رندھاوا کی زیر صدارت اسلام آباد میں جاری اور مجوزہ ترقیاتی منصوبوں کے حوالے سے ایک اہم اجلاس منعقد ہوا۔ اجلاس میں ممبر ایڈمنسٹریشن طلعت محمود، ممبر انجینئرنگ نفاست رضا، ممبر پلاننگ ڈاکٹر خالد حفیظ، ڈائریکٹر جنرل پروکیورمنٹ اینڈ کنٹریکٹ، دیگر سینئر افسران اور متعلقہ منصوبوں کے پروجیکٹ ڈائریکٹرز نے شرکت کی۔
اجلاس میں شہر کے مختلف ترقیاتی منصوبوں پر ہونے والی پیش رفت کا تفصیلی جائزہ لیا گیا۔
اجلاس کے دوران الیکٹرک بس ڈپو اور چارجنگ اسٹیشنز کی تعمیر سے متعلق امور زیر بحث آئے۔ بریفنگ میں بتایا گیا کہ زیر تعمیر الیکٹرک بس ڈپو دو سائٹس پر مشتمل ہے جن پر مجموعی طور پر تقریباً 97 فیصد تعمیراتی کام مکمل کیا جا چکا ہے۔ مزید بتایا گیا کہ بس ڈپو کی سائٹ اے پر تعمیراتی کام مکمل کر لیا گیا ہے۔
اجلاس کو بتایاگیا کہ الیکٹرک بسوں کے تمام 21 روٹس کو مکمل طور پر فنکشنل کر دیا گیا ہے۔ اجلاس کو مزید بتا یا گیا کہ الیکٹرک بس سروس کو شہریوں کی جانب سے بھرپور پذیرائی حاصل ہو رہی ہے اور روزانہ کی بنیاد پر رائیڈرشپ میں مسلسل اضافہ ہو رہا ہے ۔اس ضمن میں مورخہ 31 دسمبر 2025 کو 1,02,000 شہریوں نےاس سہولت سے استفادہ کیا۔
اجلاس میں مارگلہ ایونیو کو موٹروے ایم ون سے منسلک کرنے کے منصوبے پر ہونے والی پیش رفت کا بھی جائزہ لیا گیا۔ اسی طرح کنونشن، ایکسپو اینڈ ایگزیبیشن سینٹر کی تعمیر اور اسلام آباد میں لگژری ہوٹل کے منصوبے پر تفصیلی غور کیا گیا۔
چیئرمین سی ڈی اے محمد علی رندھاوا نے کہا کہ اسلام آباد میں میزبانی (ہاسپیٹیلٹی) کی صنعت کو فروغ دینا چاہتے ہیں تاکہ دارالحکومت کو بین الاقوامی معیار کے مطابق جدید شہر بنایا جا سکے۔ انہوں نے ہدایت کی کہ تمام ترقیاتی منصوبوں کے ڈیزائن کو اسٹیٹ آف دی آرٹ بنایا جائے۔انہوں نے ہدایت کی کہ سی ڈی اے کے آرکیٹیکچر اور ڈیزائن کے شعبے کو مزید مضبوط کیا جائے۔
چیئرمین سی ڈی اے نے اس عزم کا اعادہ کیا کہ اسلام آباد کے شہریوں کو بہترین سفری سہولیات کی فراہمی، جدید انفراسٹرکچر کی ترقی اور شہر کی مجموعی خوبصورتی و فعالیت میں بہتری سی ڈی اے کی اولین ترجیحات میں شامل ہے۔
