کراچی (ٹی این ایس) کراچی دنیا بھر میں 22 فروری کو عالمی یوم اسکاوٹس منایا گیا۔ یہ دن اسکاوٹ تحریک کے بانی رابرٹ بیڈن پاول کی سالگرہ کے موقع پر منایا جاتا ہے اور اسے خدمت، نظم و ضبط اور قیادت کے عزم کی تجدید کا دن قرار دیا جاتا ہے1907 میں شروع ہونے والی اسکاوٹ تحریک آج عالمی سطح پر منظم پلیٹ فارم کی صورت اختیار کر چکی ہے جس کی نمائندگی ورلڈ آرگنائزیشن آف دی اسکاوٹ موومنٹ کرتی ہے۔ دنیا کے مختلف ممالک میں اسکاوٹس تنظیمیں نوجوانوں کی کردار سازی، سماجی خدمت اور عملی تربیت میں مصروف ہیں عالمی یوم اسکاوٹس 2026 کے موقع پر مختلف شہروں میں پرچم کشائی، عہد کی تجدید اور فلاحی سرگرمیوں کا انعقاد کیا گیا۔ شجرکاری، صفائی مہمات، خون کے عطیات اور عوامی خدمت کے پروگرامز کے ذریعے نوجوانوں نے معاشرتی ذمہ داری کا عملی مظاہرہ کیا ماہرین کے مطابق اسکاوٹنگ نوجوانوں میں خود اعتمادی، نظم و ضبط اور باہمی احترام کو فروغ دیتی ہے۔ مختلف ثقافتوں اور زبانوں سے تعلق رکھنے والے نوجوان ایک مشترکہ مقصد کے تحت متحد ہو کر عالمی بھائی چارے کی عملی تصویر پیش کرتے ہیں۔
اس موقع پر اس عزم کا اعادہ کیا گیا کہ اسکاوٹ تحریک معاشرے میں مثبت قیادت اور خدمت کے جذبے کو مزید مضبوط بنانے کے لیے اپنی کاوشیں جاری رکھے گی۔
