کیلیفورنیا،اکتوبر10 (ٹی این ایس): امریکی ریاست کے جنگلات میں لگنے والی خوفناک آگ کے نتیجے میں 11 افراد ہلاک اور 1500عمارتیں جل کر خاکستر ہوگئیں۔بین الاقوامی میڈیا رپورٹس کے مطابق تیزہواؤں کے باعث آگ تیزی سے دوسرے علاقوں تک پھیل رہی ہے اور ہزاروں کی تعداد میں لوگ محفوظ مقامات کی جانب نقل مکانی کررہے ہیں۔ ریاستی فائربریگیڈ کے چیف کا کہنا ہے کہ آگ وسیع پیمانے پر پھیل چکی ہے جو دیگر علاقوں کو اپنی لپیٹ میں لے رہی ہے جس پر قابو پانے کیلئے تمام تر کوششیں کی جارہی ہیں جبکہ دیگر شہروں سے بھی فائر ٹینڈرز کو طلب کرلیا گیاہے۔کیلیفورنیا کے گورنر نے خوفناک آتشزدگی کے بعد ایمرجنسی نافذ کرنے کا اعلان کرتے ہوئے لوگوں کو متاثرہ علاقوں سے نکلنے کی ہدایت کی ۔حکام کے مطابق ناپا کاونٹی،سنوما اور یوبا کاوئنٹیز میں بڑے پیمانے پر جانی و مالی نقصانات ہوئے ہیں جس میں اب تک کی اطلاعات کے مطابق 11 افراد ہلاک اور متعدد زخمی ہیں جبکہ 1500عمارتیں ملبے کا ڈھیر بن گئی ہیں۔حکام نے فوری طور پر آگ لگنے کی وجوہ سے آگاہ نہیں کیا ۔
