کراچی ،اکتو بر27(ٹی این ایس) : وزیراعلی سندھ سید مراد علی شاہ کی سربراہی میں کشمیریوں سے اظہار یکجہتی کے لیے حکومت سندھ کی زیر اہتمام جمعہ کو یوم سیاہ واک نکالی گئی۔ واک میں وزیراعلی سندھ، ڈپٹی اسپیکر شہلا رضا، ارکان سندھ اسمبلی سمیت شہر کے مختلف طبقے کے لوگوں نے بڑی تعداد میں شرکت کی۔ واک پیپلز چورنگی سے شروع ہوکر نوائے وقت چورنگی پر ختم ہوئی۔ جاری کردہ اعلامیہ کے مطابق وزیراعلیٰ سندھ نے کہا کہ پاکستان سمیت دنیا بھر میں27 اکتوبر کو کشمیر پر بھارتی افواج کے غاصبانہ قبضے کے خلاف یوم سیاہ منایا جا رہا ہے جس کے لئے ملک بھر میں احتجاج کیا جا رہا ہے۔
انہوں نے کہا کہ ہمجھے خوشی ہے کہ ہر طبقے کے لوگوں نے شرکت کی، یہ ہمارا عزم ہے کہ پوری قوم کا ایک ایک فرد پاکستان کو مستحکم بنانے اور اس کی حفاظت کے لئے ہمیشہ تیار ہے اور تیار رہے گا۔ وزیراعلی سندھ نے کہا کہ کشمیر پاکستان کا اٹوٹ حصہ ہے اور رہے گا، بھارتی مظالم کشمیری عوام کے حوصلے پست نہیں کر سکتے، شہید محترمہ بے نظیر بھٹو نے بھی کشمیر کے لئے ہر پلیٹ فارم پر آواز اٹھائی، ذوالفقار علی بھٹو نے کشمیر کا مقدمہ بھرپور انداز میں لڑا،5 فروری کو یوم کشمیر کے طور پر مختص کرنا اور شملہ معاہدہ بھٹو کے عظیم کارناموں میں سے ایک ہے۔
انہوں نے کہا کہ ہمیں چاہئے کہ متحد ہوکر پاکستان کو مستحکم کریں، جب تک پاکستانی قوم میں مضبوط عزم اور بلند حوصلہ ہے کشمیر کو ہم سے کوئی نہیں چھین سکتا۔ سیہون میں پی ٹی آئی کے جلسہ سے متعلق وزیراعلی سندھ نے کہا کہ سیہون میرا تعلقہ ہے، پی ٹی آئی کے جلسے میں سیہون کی10 آدمی بھی مقامی نہیں تھے، سوائے ایک قوم اور کچھ مزار کے زائرین کے علاوہ سب لوگ باہر سے لے کر آئے۔
انہوں نے کہا کہ سیہون پر تحریک انصاف کا پروگرام طے شدہ نہیں تھا، جلسے سے پہلے انتظامیہ کو مطلع کیا جاتا ہے، سکیورٹی کی ذمہ داری حکومت سندھ کی تھی۔ انہوں نے کہا کہ پی ٹی آئی کو خاص طور پر کہا تھا کہ اسلحہ کی اجازت نہیں ہے لیکن اس کے باوجود ہتھار لے کر گئے، تحریک انصاف کے لوگوں نے مزار میں جانے کے لیے کہا، عمران خان کو کسی نے قلندر کی مزار میں اندر جانے سے نہیں روکا۔
وزیراعلی سندھ نے عمران خان اور شاہ محمود قریشی کو تنقید کا نشانہ بناتے ہوئے کہا کہ پی ٹی آئی نے لعل شہباز قلندر کی درگاہ کے دروازے بند کرنے کا ڈرامہ کیا، عمران خان کی بدقسمتی ہے کہ مزار میں نہیں پہنچ پائے۔ انہوں نے کہا شاہ محمود قریشی کے بھائی نے بھی کہا ہے کہ وہ مزار کو بیچتے ہیں جس کا وہ گدی نشین ہے۔ انہوں نے کہا کہ درگاہ کے اندر جانے کا بلاوہ ہوتا ہے جو شخص ایسے ہی لوٹ گیا اسے بلاوہ نہیں تھا، اب ڈرامے نہیں چلیں گے۔ شاہ محمودقریشی کے بھائی نے ان کو آئینہ دکھا دیا ہے۔ انہوں نے مزید کہا کہ عمران خان کو اجازت ہے جتنے چاہے جلسے کرلیں سندھ کے عوام پیپلز پارٹی کو پسند کرتی ہے، 2018ء کے انتخابات میں سندھ کے عوام پیپلز پارٹی کو ووٹ دیں گے۔
