لاہور،نومبر 03 (ٹی این ایس):مسلم لیگ(ن) کی رہنمااور نوازشریف کی صاحبزادی مریم نواز نے کہا ہے کہ میاں محمد نواز شریف کی واپسی سے کئی لوگ مایوس ہوئے۔
حلقہ 120 کے دورے کے موقع پر میڈیا سے گفتگو کرتے ہوئے انھوں نے کہا کہ اقتدار اور طاقت دینا اللہ کے اختیار میں ہے، اقتدار سے باہر رکھنا کسی انسان کے بس کی بات نہیں ہے۔انھوں نے کہا کہ یہ عوام فیصلہ کرتے ہیں کہ کسے رہنمائی دینی ہے اور 2018 میں عوام کی طاقت سے ہی مسلم لیگ (ن) دوبارہ اقتدار میں آئے گی۔
مریم نواز نے کہا کہ نوازشریف نے وطن واپس آنا ہی تھا لیکن کچھ لوگوں کو مایوسی ہوئی, اسی طرح خاندان میں اختلاف کی خبریں دینے والوں کو بھی مایوسی ہوگی، خاندان میں رنجش کی باتیں سراسر غلط ہیں ایسی توقعات رکھنے والے حلقوں کو منہ کی کھانی پڑے گی۔
