اسلام آباد نومبر 9(ٹی این ایس) وزیراعظم شاہد خاقان عباسی نے کہا ہے کہ حکومت نے دہشت گردی کے خلاف فیصلہ کن جنگ لڑی تاکہ امن قائم ہو۔یومِ اقبال کے موقع پر اپنے پیغام میں وزیرِاعظم شاہد خاقان عباسی نے کہا کہ علامہ اقبال ہماری فکری روایات کا سب سے روشن حوالہ ہیں، اقبال نے مسلمانان ہند کو منزل کا سراغ دیا، اقبال کے افکار نے مایوسی اور ناامیدی کے ماحول میں امید کاچراغ روشن کیا اور شاعرِ مشرق نے نشاندہی کی کہ جدید اسلامی مملکت کو کیا کیا چیلنج درپیش ہوسکتے ہیں جب کہ علامہ اقبال نے مسلم ریاستوں کوجمہوری اصولوں کی بنیاد پرسیاسی تشکیل نو کی راہ دکھائی۔وزیراعظم نے کہا کہ پاکستان مسلم لیگ عوام کی رائے کا احترام کرتے ہوئے مسائل کا حل چاہتی ہے، حکومت نے دہشت گردی کے خلاف فیصلہ کن جنگ لڑی تاکہ امن قائم ہو، حکومت نے ملک کی معیشت کو استحکام دیا تاکہ ترقی کے مواقع فراہم ہوں، حکومت نے مضبوط انفراسٹرکچر دیا تاکہ روزگار پیدا ہو۔ خودی کی حفاظت سیاسی استحکام اور معاشی خود کفالت کے بغیر نہیں ہو سکتی، اقبال کی فکر سے یکجہتی کا تقاضا ہے کہ پاکستانی فساد و انتشار کی قوتوں کے خلاف متحد ہوں۔انہوں نے کہا کہ علامہ اقبال کے افکار نے مایوسی کے عالم میں امید کے چراغ روشن کیے۔ علامہ محمد اقبال ہماری فکری روایت کا روشن ستارہ ہیں جنہوں نے ایک مستحکم مملکت کا خواب دیکھا۔وزیراعظم نے مزید کہا کہ شاعر مشرق علامہ محمد اقبال نے ایک آزاد اور خود مختار ریاست کا تصور پیش کیا۔
