مظاہرین،حکومت کے درمیان معاہدہ ایسے نہیں ہونا چاہیے تھا ٗطلال چوہدری

اسلام آباد نومبر 30 (ٹی این ایس) وزیرمملکت برائے داخلہ ٗ پاکستان مسلم لیگ (ن) کے رہنما طلال چوہدری نے کہا ہے کہ دھرنا مظاہرین اور حکومت کے درمیان جو معاہدہ ہوا ایسا نہیں ہونا چاہیے تھا، معاہدے میں دستخط سے لوگوں کو پتہ چل چکا ہے کہ معاہدہ کس نے لکھا۔ایک انٹرویو میں طلال چوہدری نے کہا کہ ملکی صورتحال کو مد نظر رکھتے ہوئے امن کیلئے اس معاہدے کو کیا گیا ٗ اس طرح کے واقعات کسی بھی حکومت میں کسی بھی وقت ہو سکتے ہیں تو ہمیں مستقبل کیلئے اس غلطی سے سیکھنا چاہیے۔انہوں نے کہا کہ ملک سے دہشت گردی کم اور معیشت میں بہتری آئی ہے اور اب ساری دنیا پاکستان کی معیشت اور امن کے حوالے سے تعریف کرتی ہے۔سابق وزیر اعظم نواز شریف کے حوالے سے بات کرتے ہوئے طلال چوہدری نے کہا کہ نواز شریف نے ملک کی ترقی کیلئے کام کیا ٗانہیں مقبول لیڈر نہ ماننے والا دراصل حقائق سے آشنا نہیں ہونا چاہتا۔انہوں نے کہاکہ مسلم لیگ (ن) کبھی قانون کے خلاف نہیں گئی بلکہ جو عدالتی فیصلہ آیا اس پر عمل کیا، لیکن (ن) لیگ سسٹم میں تبدیلی لانا چاہتی ہے اور لائے گی۔انہوں نے مسلم لیگ (ن) پر لگنے والے الزامات سے متعلق کہا کہ اس ملک میں جب کسی کی کارکردگی پر انگلی نہیں اٹھا پاتے تو غداری اور دشمن سے دوستی کا الزام لگا دیا جاتا ہے۔